रोम सहरतोर.
15.
माट उय्तुर विस्वसिरल विस्वसते बेस मेग़्कताह्‌कु माक विचर वातप ताकनदायो, मति मेग़्कवोरा नोमळतुन वने माट सीता कीयना गावले. 
ओरिन लजा केवा ओरा विस्वसतुन मेग़्किह कीयना गावले. 
माट बह ताकना इनजोर किर्स्तु माक तोहचीतोग़. ओग़ इद बूमतगा मनदह्‌पा, तन्क विचर वातव कबस्क कीसोर तिरियोग़, अद्रमे मन्कलोरा कदरवने पर्ह्‌कोग़. मति देवुळबाबाह्‌क विचर वातव कबस्किने कींदोग़. सास्त्रमतगा ओना लोप्पा इद्रम रासतद मन्ह्‌ता इतेके, ए देवुळतिन, नीक पास्कताङ पोल्‍लोङ नाक तोकताङ, इनजोर रासतद मन्ह्‌ता. 
इद्रमलेह्‌का देवुळता सास्त्रमतगा बाताङ बाताङ पोल्‍लोङ मुने रासतव मन्ह्‌ताङ, अव पोल्‍लोङ माक काग़्हतलाहि रासतव मन्ह्‌ताङ. अविस्किन अर्वतेके माक दीरा दोर्किह्‌ता, अद्रमे माट तिपल्कने आरेम आयवा देवुळता पोग़ोन आसा तास पग़यह्‌नल. 
इद दीरा, आसा देवुळतग्डाहि वास्ता. इदे देवुळि, किर्स्तुना विचर मतपु, मीक उंद एकाते मनदलाहि तोळ ईयि! 
अस्के मीट सबेटोरिर उंदिय विचरते, उंदिय लेङते मावा येसुसामि किर्स्तुना देवुळबाबाह्‌कु मान ईसि, जोहर कीया पग़यकिर. 
किर्स्तु बेद्रमलेह्‌का मीक एरे कीतोग़, अद्रमेलेह्‌काने मीटवने ओर्विन-ओर्वोग़ एरे कीसि, देवुळतुह्‌क मान ईम्ह्‌टु. 
बह इतेके किर्स्तुना राजेमते यहुदिरिह्‌क वने, ओसो यहुदि आयवोरिह्‌क वने जागा मन्ह्‌ता. वेल्‍लाङे वर्साना मुने देवुळि यहुदिरा तादोर-बाबोरिह्‌क किरिया कीस मता. अद किरिया करल आयना इनजि, यहुदिरगा ओर्वोग़ सेवा केवाना लेह्‌का आसि किर्स्तु इद बूमते वातोग़, इदिन सीता कीम्ह्‌टु. 
ओसो उंद पोल्‍लोतेनाह्‌क वने इद बूमते वातोग़. अद बाताल इतेके यहुदि आयवोर वने, देवुळि ओरा पोग़ोन कीतद दयातेनाह्‌कु, तान जोहर कीयिर. अदिना लोप्पा देवुळताङ पाटानगा दाविद राजाल इद्रम रासतोग़: ए देवुळि! नना दुस्राङ जातिनोरा संगे कलियिसि, नीक पाटाङ ओसि जोहर कीकन, इनजोर रासतोग़. 
ओसो इद्रमवने रासतद मन्ह्‌ता. ए सबे जातिनोरिर! देवुळता मन्कलोरा संगे मीटवने गिर्दा आम्ह्‌टु. 
ओसो उंद पाटातगा इद रासतद मन्ह्‌ता: ए इस्रयेलतोर आयवोरिर! मीट सबेटोरिर देवुळतुन जोहर कीम्ह्‌टु! इद बूमताङ सबे जातिनोर तान जोहर कीयिर. 
ओसो यसया कबुरतोग़ वने इद्रम रासतोग़: दाविद राजाना कूळतोग़ ओर्वोग़ पुटनोग़, ओग़ सबे जातिनोरा पोग़ोन तना राजेम ताकिह कीयनोग़, ओना पोग़ोन सबे जातिनोर आसा तासनुर, इनजोर रासतद मन्ह्‌ता. 
मीक आसा ईयनद देवुळतुन मीट विस्वस कीयनाह्‌कु, गिर्दाते ओसो सुकमते अद मीवा जीवातुन निहचीयि. अस्के ताना पवित्र जीवाता लावते मीवा आसा वीळसोर दायग़ा. 
मावोरिर! मीट पका बेस गूमनतोरिर ओसो देवुळता पोल्‍लोतुन बेस पुनजि, ओर्विह्‌क-ओर्वोग़ बुदिङ-एदिङ बेस वेहता पग़यह्‌निर इनजोर नाक पूरा विस्वस मन्ह्‌ता. 
मीट देवुळता पोल्‍लोतुन बेस पुतिर, तेला मति इव सबेटविन मीक ओसो सीता कीस ईयलाहि, पिंगम-पंगम रासतन. देवुळि नाक देय्वा ईसि, 
यहुदि आयवोरिह्‌क बेसता कबुर वेहतलाहि नाक किर्स्तु येसुना बळयि आयना इनजि लोहता. बेद्रम देवुळता बूमयाल ताना मुनेह तान्क विचर वायनद कोड वाटिह्‌तोग़, अद्रमलेह्‌काने नना पोकुर कीतद कबुरतुन नमवालोर यहुदि आयवोर विस्वसिर, नावा कयदाहि देवुळतुह्‌क वाटटद कोडलेह्‌का मन्ह्‌तोर. देवुळता पवित्र जीवा ओरिन एडिह कीताह्‌कु, ओरवने देवुळता मुनेह पवित्र आतोर. 
अदिनेनाह्‌क नावा मेटे किर्स्तु येसु कीतद इद सेवाता बेचोटा बेरा पाय्दा आस्ता, इद पोल्‍लोतुन वेहतलाह नना मुर्तिय लजा आयोन. 
यहुदि आयवोरु नना वेहतव पोल्‍लोन केंजतोर; नावा कयदे कीतवु बामनाह लेह्‌काडाङ सीनान ऊळतोर. केंजिसि, ऊळिसि, किर्स्तुन विस्वस कीतोर. इद्रमलेह्‌का देवुळता जीवाता लावते येरुसलेम सहरताहि इलुरिकुम पट एवनाह नना किर्स्तुना बेसता कबुरताङ सबे पोल्‍लोन तपवालेवा वेहतन. इद्रम किर्स्तु नावा कयदे कीतव पोल्‍लोनु दीराते वेहतह्‌नन, अविस्किन विळ्सिसि दुस्रा बेदे वेहोन. 
इद्रमलेह्‌का बेसता कबुरतुन ओयह्‌पा, किर्स्तुना पोल्‍लोतुन मुनेन मुर्तिय केंजवोरगा दायलाह विचर कींदन. दुस्रोग़ दोहतद जोतातगा नना लोन पंडनद ओप्पो, अद्रमलेह्‌का दुस्रोर पोकुर कीतद नाटेनगा दायलाह नाक विचर वावो. 
देवुळता सास्त्रमतगा किर्स्तुना लोप्पा रासतप लेह्‌का कीय्ह्‌नन, अद इद्रमलेह्‌का: मुने बेगा ओना कबुर एव्वो, अगा ओना कबुर एवयग़ा, मुने बोर केंजोर, ओर केंजिस पुंदनुर, इनजोर रासतद मन्ह्‌ता. 
इद्रम बेसता कबुर एववव जागानगा तिरियसोर मंदन, अदिह्‌क इचानाह मियगा वायलाह नाक अग़ दोर्को आस मता. 
मति इंजेके इकेडाङ नाह्‌कनगा नावा कबळ मारिह कीतन. ओसो वेल्‍लाङे वर्सानाहि मियगा वायलाह नना अग़ ऊळिंदन. 
अदिनेनाह्‌क इद मल्का मीवा अबरता इस्पानिया देसेम दायह्‌पा, मियगा वायकन इनजोर आसा कीयलाह आतन. मियगा रेंड मूंड दियाङ रोमतेके नावा जीवातुह्‌क गिर्दा आयग़ा, पया अग्डाह नना पेसकन. नाक इस्पानिया देसेम दायलाहि गर्ज अरयनद मीट ईकिर इनजोर नावा आसा मन्ह्‌ता. 
मति मियगा वायनामुने येरुसलेमता विस्वसिरा सेवा कीयलाह नाक अगा दाया पोयह्‌ता. 
येरुसलेमते मनवालोर मावा ऐंगेटोर गरिब विस्वसिर तिपलते मन्ह्‌तोर, इनजि मकिदुनिया पटटोर ओसो अकाया पटटोर यहुदि आयवोर विस्वसिर, ओरेनाह्‌क कोताङ अर्हचि लोहचीयना इनजोर विचर कीतोर. इवे कोताङ एवसिह कीयलाहि नना इंजेके दायलाह आतन. 
मुने यहुदि आयवोरिह्‌क देवुळता पोल्‍लोता गर्ज मता, अस्के येरुसलेमता यहुदि जाततोर विस्वसिर ओरगा देवुळता पोल्‍लोतुन एवसिह कीसीतोर. मति इंजेके येरुसलेमता विस्वसिरिह्‌क तिंड-बंडटा गर्ज मन्ह्‌ता. मुने ओरग्डाहि माक देवुळता पोल्‍लो दोर्कता इदिन सीता कीसि, इकेडोर यहुदि आयवोर विस्वसिर अद गर्जतुन निहतलाहि पका गिर्दा आस्तोर. 
इंजेके नना ओर अर्हतव कोतानु येरुसलेमतोर विस्वसिरगा ओसीयनद कबळतुन मारिह कीसि, ओरा कयदगा बेस-नेह्‌ना एवसिह कीस ईतापया मियगाह्‌के इस्पानियाता अग़ पोयकन. 
नना मियगा वास कलियकन अस्के लेकालेवा किर्स्तुना बर्कत माक दोर्कग़ा इनजोर नाक एर्का मन्ह्‌ता. 
मावोर विस्वसिरिर! माट मावा येसुसामि किर्स्तुना संगे जोळेम आताह्‌कु, ओसो देवुळता जीवा माक ओर्विह्‌क-ओर्वोग़ जीवा कीयनाह कीताह्‌कु, नना मीक उंद अर्जि कीय्ह्‌नन: यहुदा पटटगा विस्वस केवोरा कयदाहि नना पिसना इनजोर पार्तना कीय्ह्‌नन. ओसो येरुसलेमतगा नना ओसीयनव दर्मम कोतान अग्डोर एनिर, इनजोर पार्तना कीय्ह्‌नन. मीटवने बेस्केन माग़्ङवालेवा इव पोल्‍लोनेनाह्‌क पार्तना कीसोर मन्ह्‌टु. 
देवुळि माट ताल्ह्‌कतप कीतेके, नना सुकमते मियगा एवयकन, एवतस्के मीवा संगे कलियिस नावा जीवातुह्‌क आरम दोर्कग़ा. 
सुकम ईयनद देवुळि मीट सबेटोरा तोळ मनि. आमेन.