बळयिर.
18.
पया पोलु एतेंस सहरताहि अकाया पटटा कुरिंत सहरते अतोग़. 
अतस्के अगा ओर्वोग़ अक्विला पेदिरतोग़ यहुदि मन्कल कलियतोग़. ओना मुतेना पेदिर पिरिस्किला आंदु. ओग़ पुन्ह्‌तुस पटटोग़ आंदोग़. रोम राजेमता कलोदियुस राजाल सबे यहुदिरिन इतालिया पटटा रोम सहरताहि पेसिस दायलाह उकुम ईस मतोग़. अदिह्‌क ओर आळ इर्वुर इतालिया पटटाहि पेसिसि कुरिंत सहरतगा वातोर. 
ओर आळ इर्वुर टमिङ पंडिस वमना दंदा कींदुर. पोलु वने टमिङ पंडिन्दोग़, अदिह्‌क ओग़ वने ओरगा मनजि अद कबळ कींदोग़. 
ओसो वारम-वारमता पोल्वादियाते देवुळता पार्तनाता लोन अंदोग़, अगा यहुदिरिह्‌क, युनानिरिह्‌क यहुदिरा सास्त्रमतुन अर्विसि येसुना पोल्‍लोतुन तेळियिह कीस वेहन्दोग़. 
पया सीलासि, तिमोति, मकिदुनिया पटटाहि कुरिंत सहरते वातोर. ओर वातापया, पोलु तना टमिना कबळतुन विळ्सिस देवुळता पोल्‍लोतुन दिनमे पोकुर कींदोग़. सास्त्रम वेहतपु देवुळि बोग़ पिसिह केवान लोहतना मता, ओग़ येसुये आंदोग़ इनजोर यहुदिरगा साक्सि वेहन्दोग़. 
मति यहुदिर ओनाङ केंजवा ओन पास्किस विरुद कींदुर. अदिह्‌क देवुळि ओङ आता इनजोर तोहतलाहि पोलु तना जगातुन सायिसि, “येसुन विस्वस केवेके, देवुळि मीकु सिक्सा ईयग़ा, ताना जबब्दर नना आयोन, मीटे आयकिर! इंजेटाहि नना यहुदि आयवोरिह्‌क वेहतलाह दाय्ह्‌नन,” इतोग़. 
इनजि पया पार्तनाता लोताहि पेसिस तीतुस युसतुस पेदिरतोना लोन अतोग़, ओग़ यहुदि आयोग़ मति यहुदिरा देवुळतुन मोळ्किंदोग़. ओना लोन पार्तनाता लोता कचुल मता. 
पया पार्तनाता लोतुन ताकिह केवाल किरिस्‍पुस पेदिरतोग़ मुक्याना पूरा लोतोर येसुन विस्वस कीतोर. ओसो कुरिंत सहरतोर वेल्‍लाटोर पोलुना पोल्‍लोतुन केंजिसि, येसुन विस्वस कीतोर, कीसि येसुना पेदिरते एग़ मीतोर. 
उंद दिया नग़्का देवुळ तोहतना लेकाते येसुसामि पोलुह्‌क दिसिस, “नना नीवा तोळ मह्‌नन पोलु, नीक बोरे कय बोयोर आयनुर. इद सहरतगा वेल्‍लाटोरिन नना आचतन. अदिह्‌क केमेन मनमा, रेयवालेवा पोकुर कीसोर अन,” इनजोर इतोग़. 
पया डेडा वर्सा आनाहि पोलु कुरिंत सहरते मनजि देवुळता पोल्‍लोतुन वेहचोर मतोग़. 
पया गलियो पेदिरतोग़ मन्कल अकाया पटटा गुमसि आतोग़. अस्के यहुदिर कलियिस पोलुन जग्ळा कीतोर, कीसि ओन नेयम कीयनद जागातगा ओसि गुमसिन इद्रम वेहतोर. 
“वेग़ मन्कल देवुळतुन बेद्रम मोळ्कना इनजोर मन्कलोरिन काग़्हता बोटटोग़, मति वेग़ वेहतनाङ पोल्‍लोङ काय्दाता अडम मन्ह्‌ताङ,” इतोर. 
पया पोलु वळ्ह्‌कलाह आसोर मतोग़, अस्केन गलियो यहुदिरिन इतोग़, “ए यहुदिरिर! वेग़ मन्कल बेदाय कसुर कीतेके, इलवेके बेद लाग्वा कबळ कीतेक, नना मीवा पोल्‍लोतुन केंजेनन. 
मति इद सबे मीवाङे अडोनाङ पोल्‍लोङ काग़्हतनाङ, पेदिर्क वेहतनाङ. तान मीटे ऊळाट, इद्रमताङ पोल्‍लोन नना नेयम केवोन,” इनजोर इतोग़. 
इनजि ओरिन नेयम कीयनद जागाताहि पूंडटोग़. 
पया अगा मतोर युनानिर बाताल कीतोर इतेके, देवुळता पार्तनाता लोता मुक्याल सोस्तिनेस इनवान पोसि, नेयम कीयना जागाता मुनेह नल्हतोर, मति गलियो मुर्तिय पर्वा केवोग़. 
अद्रमे पया पोलु कुरिंत सहरतोर विस्वसिरा संगे वेल्‍लाङे दियाङ मतोग़. पया “दाय्ह्‌नन” इनजोर वेहचि, मुने देवुळतुन किरिया कीस मताह्‌कु किंक्रिया नाटे अनजि तला कोग़ियतोग़. पया पोलुना संगे पिरिस्किला, अक्विला वने सुरिया पटटे दायलाह ओडातगा उदतोर. 
उदिसि आसिया पटटा इपिसुस सहरते रेगतोर. रेगतापया ओर आळ इर्वुर उंद अग़दे अतोर. पोलु बार देवुळता पार्तनाता लोन अतोग़, अनजि यहुदिरिह्‌क येसुनाङ पोल्‍लोङ वेहतोग़. 
पया ओर ओन रेंड दियाङ मनजि दायलाह अर्जि कीतोर, मति पोलु केंजोग़. 
“देवुळता विचर मतेके नना ओसो मियगा वायकन,” इनजोर वेहचि इपिसुस सहरताहि केसरिया सहरते दायलाह ओडातगा उदतोग़. 
उदिस यहुदा पटटा केसरिया सहरतगा रेगतोग़, रेगिसि येरुसलेम अनजि अग्डोर विस्वसिरिन कलियतोग़. कलियिस पया अग्डाहि सुरिया पटटा अंताकिया सहरते अतोग़. 
अगा उचुक दियाङ मनजि ओसो वने पेसिस गलत्या पटटा पुरुगिया एरियाता विस्वसिरिह्‌क दीरा ईसोर तिरियतोग़. 
पया उंद दिया ओर्वोग़ मिसर देसेमता सिकंदरिया सहरते पुटटोग़ अपुलोस पेदिरतोग़ यहुदि मन्कल इपिसुस सहरते वातोग़. ओग़ पका कग़यिस मतोग़, ओसो देवुळता सास्त्रमताङ पोल्‍लोन बेस पुन्ज मतोग़. 
बोग़ो ओन येसुसामिना कबुरतुन काग़्हच मतोग़. अदिह्‌क ओग़ पका जिदते येसुनाङ पोल्‍लोन चुकवालेवा वेहचोर, काग़्हचोर मतोग़. मति देवुळता पेदिरते एते मीहवाल योहन मुने काग़्हतव पोल्‍लोङ, अचोने पुन्ज मतोग़. 
पया ओग़ इपिसुस सहरतगा देवुळता पार्तनाता लोन अतोग़, अनजि अगा पका दीराते पोल्‍लोङ वेहन्दोग़. उंद दिया पिरिस्किला, अक्विला ओग़ वेहतनाङ पोल्‍लोन केंतोर. केंजिसि ओन तमा लोन ओसि देवुळताङ पोल्‍लोन ओसो बेस तेळियिह कीसीतोर. 
पया अपुलोस अकाया पटटे दायलाह विचर कीतोग़. विचर कीतस्के इपिसुसतोर विस्वसिर ओन गिर्दाते अगा लोहतोर. अकायातोर विस्वसिरिह्‌क सीटि रासिस, अपुलोसिन बेस ऊळलाह वेहतोर. पया ओग़ अकायाते अतोग़. अगा अतस्के देवुळि देय्वा ईताह्‌कु येसुन विस्वस कीतोर मन्कलोरिह्‌क पका तोळ ईतोग़. 
बेद्रम इतेके, अग्डोर यहुदिरिन येसुये पिसिह केवाल किर्स्तु आंदोग़ इनजोर देवुळता सास्त्रमतग्डाहि ओरिन बेस-नेह्‌ना तोहतोग़. ओर वळ्ह्‌कवाह सबेटोरा मुनेह देवुळताङ पोल्‍लोङ वेहन्दोग़.