बळयिर.
5.
अद्रमे विस्वसिरा मुडगा अनन्या पेदिरतोग़ मन्कल मतोग़, ओना मुतेना पेदिर सपिरा आंदु. आळ इर्वुर आसि तमा उचुन जागातुन वमतोर. 
पया अनन्याल बाताल कीतोग़ इतेके, वमतव कोतानग्डाहि वळ्गा कोताङ तमेनाह्‌क लोन तासतोग़, इद पोल्‍लोतेनाह्‌क तना मुते वने ओन्क तोळ आता. पया पिसतव कोतान बळयिरगा तचि ईतोग़. 
मति पत्रु ओन इतोग़, “अनन्या! देयमता कबळतुन नीवा बुदतगा बाराह्‌क वाया ईतिन? जागातुन वमतव वळ्गा कोताङ मियेनाह्‌क तासतिन, वळ्गा कोताङ ततिन, पूराय कोताङ ततप लेह्‌का अविस्किन मयग तचि ईतिन. इद्रम निमा देवुळता पवित्र जीवाता मुनेह जोल आतिन. 
तान वमनामुने वने अद नीवा कयदे मता, वमतापया वने अव कोतानगा पूरा नीवाय अदिकर मता. देवुळतुह्‌क ओपवद कबळ कीयलाहि बाराह्‌क विचर कीतिन? निमा सिरप मन्कलोरिन आयो, मति देवुळतुने जोल वळ्ह्‌कतिन,” इनजोर इतोग़. 
पत्रु इतद पोल्‍लोतुन अनन्याल केंताहे नेल अरसि अगान हातोग़. इद पोल्‍लोतुन केंतोर सबेटोर पका रेयतोर. 
अगा मतोर लेयोर वासि ओना सेत्तातुन गेंदेते ऊर्हतोर, ऊर्हचि पलते ओस गति कीतोर. 
इद पोल्‍लो आस मूंड गंटाना पया, हातोना मुते सपिराल वाता. तना मुजो हातोग़ इनजि अद मुर्तिय पुनो आसि! 
पया पत्रु तान इतोग़, “अले! वेहा! मीवा बूमतुन इचोके कोताने वमतिरा?” “इंगो दादा! इचोके” इता. 
पत्रु इतोग़, “जोल वळ्ह्‌कतेके देवुळता जीवा ऊळग़ाया, इनजि आळ इर्विर आस बाराह्‌क इद्रम पट ऊळतिर? ऊळा! नीवा मुजोना सेत्तातुन पोहतोरु अग़दगा एवतोर, नीक वने अहे ओयनुर,” इनजोर इतोग़. 
पत्रु इद्रम इताहे, अद वने ओना मुनेह अरसि हाता. अस्के ताना मुजोन पोहता मन्कलोर लोप्पा ओळियतोर. अद हातदिन ऊळिसि, ताना सेत्तातुन तना मुजोन पोहता जागातगा कचुल ओस मिसतोर. 
विस्वसिरा पूरा मुलु, ओसो इद पोल्‍लोतुन केंतोर सबेटोर पका रेयतोर. 
अद्रमे पया बळयिरा कयदे देवुळताङ बामनाह लेह्‌काडाङ वेल्‍लाङे सीनाङ लोकुरा मुनेह आंदुङ. (विस्वसिरा मुलु मंदिरता साल्मोन राजाना मंडातगा उंदिय एकाते जमा आंदुर. 
विस्वस केवोर ओरगा कलियलाह रेयिंदुर, मति सबेटोर विस्वसिरिन पका मान ईन्दुर. 
वेल्‍लाटोर आस्क-कोय्तोर किर्स्तुन विस्वस कीसि ओरगा वास कलियिंदुर. अह आसि विस्वसिरा मुल बल्गेम आंदुर.) 
बामनाह लेह्‌काडाङ सीनाङ ऊळिसि, पत्रु दायनद अग़दे दुक अरतोर मन्कलोरिन कटुस्क अग़्के, माग़िङ अग़्के, अग़दगा पेसिह कीस तासिंदुर. ओना दळ्मतेला उय्तुरगा अरसि ओर सव्रेम आयनुर इनजोर लोकुरा आसा मंदु. 
येरुसलेम सहरता एरे मतव नाह्‌कनाहि वेल्‍लाटोर दुक अरतोरिन, देयह्‌क पोस मतोरिन अगा पोस वांदुर. ओर सबेटोर बळयिरा कयदे बेस आंदुर. 
अस्के लोकुर किर्स्तुना बळयिरिह्‌क मान ईयनदिन ऊळिसि, मोदुल पेर्माल ओसो ओना तोळतोर सदुकिरा जीवा कर्विंदु. 
जीवा कर्विसि, बळयिरिन पोस जेलतगा वाटलाहि वेहतोर. 
पया ओर जेलते मनदह्‌पा नग़्काडा वेलाते बाताल आता इतेके, देवुळता देवतुलि वासि जेलता अग़दुन तेग़ियता, तेग़ियिस बोन्के दिसवाह ओरिन पेसिह कीता. 
पेसिह कीसि ओरिन वेहता, “मंदिरताङ मंडानगा अन्ह्‌टु, अगा निचि देवुळता पिसमुळता इद पूरा कबुरतुन अगा मनवालोर सबे लोकुरिह्‌क वेहचीम्ह्‌ट,” इता. 
अस्के बळयिर देवतुल वेहतपु पङवियतस्के मंदिरतगा अतोर, अनजि मंडानगा निचि लोकुरिन काग़्हता बोटटोर. ओर काग़्हतह्‌पा, मोदुल पेर्माल, ओना तोळतोर बार बाताल कीतोर इतेके, यहुदिराङ तग्वाङ केवालोर, सबे पेदल्किन केयिसि, बळयिरिन जेलताहि तता वेहतोर. 
मति मंदिरता पोलिसिर अंज ऊळतापया बळयिर अगा इलोर, अदिह्‌क ओर पंचतगा मल्‍स वासि इद्रम वेहतोर, 
“जेलता अग़दगा बेस तालम वाटिस मता, सीपय्क वने अग़दगा राकातुह्‌क मतोर, मति लोप्पा तेग़ियिस ऊळतापया बोरे इलोर,” इतोर. 
मंदिरता दरोगाल ओसो पेर्मालोर इद पोल्‍लोतुन केंजिसि इंजेके बह आयग़ा, इनजोर बळयिरेनाह्‌क एक्बेक आतोर. 
अचोटेन ओर्वोग़ मन्कल वासि, “मीट जेल वाटिस मतिर ओर मन्कलोर मंदिरताङ मंडानगा निचि लोकुरिन येसुना पोल्‍लो काग़्हतलाह आतोर,” इनजोर इतोग़. 
अस्के मंदिरता दरोगाल तनाङ पोलिसिरिन पोस मंदिरताङ मंडानगा अतोग़, अनजि बळयिरिन पंचते ततोग़. लोकुर माक बंडाङ उकिस हव्कना आयो इनजि जबरदस्ति केवा बळयिरिन ततोर. 
पया ओरिन तचि तग्वाङ केवालोरा मुनेह निल्पिह कीतोर, कीतस्के मोदुल पेर्माल ओरिन इद्रम इतोग़, 
“येसुना पोल्‍लोतुन काग़्हतनद आयो इनजोर मीक वेहोमा? मति मीट इतेके येरुसलेमतगा कतमतोरिने ओना पोल्‍लोतुन काग़्हचीतिर. अचोने आयो मति ओन माटे हव्कनाह कीतोम इनजोर मावा पोग़ोन कसुर वाटलाह ऊळिह्‌निर?” इनजोर तप तोहतोर. 
मति पत्रु ओसो दुस्रोर बळयिर इद्रम इतोर, “मन्कना पोल्‍लोतुन आयो, मति देवुळताये पोल्‍लोतुन माक केंज पोयह्‌ता. 
येसुन मीट मराता हव्कनागुटातगा वेळ्हच हव्कनाह कीतिर, मति मावा तादोर-बाबोरा देवुळि ओन जीवा अर्हता. 
जीवा अर्हचि, ओने सामि, पिसिह केवाल इनजि देवुळि निल्पिह कीता. मावा इस्रयेलतोरिनपापमता अग़दाहि मल्हतलाहि, मावा पापमतुन मापि कीयलाहि ओने निल्पिह कीसि, तना तिनळ बाजे पका कदर ईसि उदिह कीता. 
इव पोल्‍लोना माट साक्सि मह्‌नोम. तानाङ पोल्‍लोङ केंजिसि ताकवालोरा पोग़ोन, देवुळि उदिह कीतद पवित्र जीवा वने इव मावा पोल्‍लोना साक्सि ईस्ता,” इतोग़. 
पत्रुना पोल्‍लोतुन केंतोर तग्वाङ केवालोरिह्‌क पका ओङ वाता. ओङ वातस्के, बळयिरिन हव्कलाह तयर आतोर. 
मति ओरगा गमलियेल पेदिरतोग़ वग़ोग़ मतोग़, ओन यहुदिर पका कदर ईन्दुर. ओग़ परुसिरा तुंगातग्डाहि देवुळता सास्त्रम काग़्हवाल गूरु मतोग़. ओग़ तेदिसि बळयिरिन अग्डाहि गळ्क पलते पेसिह कीयलाहि, सीपय्किन वेहतोग़. 
ओर अतस्के, तग्वाङ केवालोरिन इद्रम इतोग़, “मावोर इस्रयेलतोरिर! मीट वेरिन बाताल कीयलाहि ऊळिह्‌निर, तान बेस आलिह कीम्ह्‌टु. 
बाराह्‌क इतेके, बेचोको वर्साना मुने तियुदास पेदिरतोग़ ओर्वोग़, नना बेरोनन इनजोर नडुमिय पुटिस मतोग़. अस्के नालुङ नूह्‌क मन्कलोर ओनेके आस मतोर, मति बाताल आता, रोम सर्करतोर सीपय्क ओन हव्कतोर. ओनेके आस मतोर सबेटोर बिरोबटो आतोर, ओना कबळ मायता. 
“इद पोल्‍लो आतापया, रोम सर्करतोर सिरगंति कीयलाह वेहच मतोर, अस्के गालिल पटटोग़ यहुदाल इनवाल सर्करता विरुद आतोग़. ओनाङ केंजिसि उय्तुर ओना पेग़्के अतोर, पया ओन वने हव्कतोर. ओना पेग़्के अनवालोर सबेटोर बिरोबटो आतोर. 
अदिह्‌क इंजेके वने नना मीकु वेहतलाह आतन. मीट पोयतोरिन बाताले केमाटु, ओरिन विळ्सिस ईम्ह्‌टु. वेराङ विचर्क, वेराङ कबस्क मन्कना बुदताङ मतेके तमाय मायनुङ. 
मति देवुळतग्डाह मतेके, मीट तान मायपिह कीया पग़विर. मायपिह कीयलाहि ऊळतिर इतेके, देवुळताये संगे लळेम आयवालोरिर आयकिर, अद्रम आयमाट,” इनजोर इतोग़. 
इतस्के, तग्वाङ केवालोर गमलियेलना पोल्‍लोतुन केंतोर. पया बळयिरिन लोप्पा तता वेहतोर. ततापया ओरिन तोला जूताते नल्हता वेहचि, येसुना पोल्‍लोतुन ओसो बोन्के वेहमाट इनजोर वेहचि, विळ्सिस ईतोर. 
विळ्सिस ईतस्के बळयिर, येसुना पेदिरतेनाह्‌क माक देबाङ अरताङ, इनजोर बेस गिर्दाते पंचताहि पेसिस अतोर. 
ताना पया दिनम मंदिरताङ मंडानगा, लोह्‌क-लोह्‌क वने देवुळ आचतोग़ पिसिह केवाल किर्स्तु राजाल येसुये आंदोग़, इनजोर रोमवालेवा काग़्हचोरे, बेसतल कबुर वेहचोरे मंदुर.