योहन.
20.
मूंड दियाने, इतेके ऐतारम, कोग़ कूसेङ पिङपङ आयनामुनेने, मग्‍डला नाटेनद मरियाल इनदनदु, गुमयातगा वाता. अस्‍के गुमयाता अग़दुह्‌क तिळ्ह्‌प कीस मतद बंडा ओर्के तेंडिस मतद तान्‍क दिसता. 
अस्‍के सिमोन पत्रुनके ओसो नयके, अद वित वाता, वासि इता, “ओर सामिना सेत्तातुन गुमयातग्‍डाह ओतोर, ओसो अदिन बेगा तासतोरो, अद माक तेळियो.” 
इदिन केंजिसि माट इर्वोम गुमयाते दायलाह पेसतोम. 
अस्‍के माट इर्वोम आसि ऐंगे वित बोटटोम. इह वितेङ, अह वितेङ, नना गुमयातगा मुने एवतन. 
एवसि, ओलिस ऊळनेके, नाक सिरपि हामुर-गेंदेङ अरस मतव दिसताङ, मति नना लोप्पा नेङोन. 
गेळ्‍क मनेके सिमोन पत्रुवने नावा पयाह एवतोग़, एवसि तुरुम्‍ने लोप्पा नेङतोग़, नेङिसि हामुर-गेंदेङ अरतविन ऊळतोग़. ओसो सेत्ताता तलातगा ऊर्ह्‌च मतद दुपटि हामुर-गेंदेना एरे इले, मति ओर्केडा बाजे गीळ आसि अरस मतदिन ओग़ ऊळतोग़. 
पया ननावने लोप्पा नेङिसि इविन ऊळतन, ऊळिसिये येसु जीवा अरतोग़ इनजि विस्‍वस कीयलाह आतन. 
बाराह्‌क इतेके येसु हामुरताहि ओसो जीवा अरयनद गावले, इद्रम सास्‍त्रमते रासिस मतद पोल्‍लो माक अचानाहि तेळियवाय मता. 
पया माट इर्वोम मल्‍सि मावाङ लोह्‌क अतोम. 
अचोटेने मरियालि गुमयातेहु मल्‍स वाता, अगाने अळसोरे पलते निच मता. पया अळसोर-अळसोर, अद गुमयातेह माळकिस ऊळता. 
ऊळतस्‍के, येसुना सेत्तातुन तासिस मतद जागाते पोळ्‍दलेह्‌का मांजतप पांड्रि गेंदेङ केग़तवु रेंड देवतुल्‍क, उंद बारा तलावडातके, उंद बारा कालवडातके उदिस मतव तान्‍क दिसताङ. 
अव पया तान इताङ, “बाराह्‌क अळयह्‌निन बायि?” “ओरु नावा सामिना सेत्तातुन ओतोर, ओस अदिन बेगा तासतोरो, पुनोन इनजोर अळयह्‌नन,” इनजि मरियालि अविस्‍किन इता. 
अह इनजि अद पेग़्‍के मल्‍स ऊळता, मल्‍स ऊळनेके अगा येसु निच मतद तान्‍क दिसतोग़. मति ओग़ येसुये, इनजोर अद पुनो. 
अस्‍के येसु तान इतोग़, “बाराह्‌क अळयह्‌निन? बोन पर्ह्‌किह्‌‍निन?” ओग़ वाळुमतुन ऊळेवाळे केवाल मंदनोग़ बहे इनजि ओन इता, “दादा, निमा ओना सेत्तातुन इग्‍डाह ओतेके, तान बेगा तासतिन, इद नाक वेहा, अस्‍के माट अदिन ओसि ओसो बेस पोहतकोम.” 
येसु पया तान “मरिया!” इनजोर केयतोग़, अस्‍के अद पेग़्‍के मिळ्‍न्‍दिस येसुन पुता, पुनजि ओन इब्रि पोल्‍लोते “रबोनि!” (इतेके “नावा गूरु”) इनजोर इता. 
अस्‍के मरियालि ओनाङ काल्‍क अरताह्‌कु येसु इतोग़, “नावाङ काल्‍किन ओग़्‍ङिस मनमा मरिया, बाराह्‌क इतेके नना इंका वने बाबानके पोग़ोन अनोने, ओसो बेचोको दियाङ मंदकन. मति निमा मावोर कग़वालोरके अनजि ओरिन वेहा, ‘मीवा-नावा बाबानके, मीवा-नावा देवुळतके नना दाय्ह्‌नन,’ ” इनजि येसु तान वेहतोग़. 
अस्‍के मग्डला नाटेना मरियाल अनजि, “नना सामिन ऊळतन, ओग़ नाक इद्रम-इद्रमताङ गोटिङ वेहतोग़,” इनजोर अद माक कग़यवालोरिह्‌क वेहता. 
अदे ऐतारमता दिया, मुलतस्‍के यहुदिराङ पेदल्‍किन रेयिसि माट कग़यवालोरोम अरातगा तल्‍प केहच तालम ईसि मकिस मनदह्‌पा, येसु अगा वासि लोप्पा नेङतोग़. नेङिसि, मयगा नडुम निचि, माक इतोग़, “मीक सुकम दोर्कि, रेयमाटु!” 
इनजोर वेहचि माक तनाङ कय्‍कनाङ ओसो सेंकाता देबानु तोहतोग़. सामिन ऊळिसि माक गिर्दा वाता. 
ओसो उंद मल्‍का येसु माक इतोग़, “मीक सुकम दोर्कि, रेयमाटु! बहलेह्‌का बाबाल नाक इद दुनियाते लोहतोग़, अहलेह्‌का ननावने मीक नावा कबुर वेहतलाह लोहतह्‌नन.” 
इद्रम वळ्ह्‌किसि ओग़ माक ऊकुर ऊरतोग़, अह कीस इतोग़, “नना मीकु देवुळता पवित्र जीवा ईय्ह्‌नन. 
तेना अदिकरते मीटु बोनाय पापमतुन माप कीतिर इतेके देवुळवने ओना पापमतुन माप कीताये. ओसो पवित्र जीवाता अदिकरते बोना पापमतुन मीट माप केविर इतेके ओग़ मापि आयवाय मंदनोग़.” 
माट कग़यवालोरोम बारा मांदतोरग्‍डाहि ओर्वोग़ तोमाल इनवाल मतोग़, ओन दिदुमि (इतेके एमोह पेकल) वने इंदुर. येसु वातोग़ अस्‍के ओग़ तोमाल मावा संगे इलेग़ आसि. 
अदिह्‌क ओग़ वातस्‍के “माट सामिन ऊळतोम, रा!” इनजोर ओन माट वेहतोम. तेला मति ओग़ सेतेम पोयोग़, ओग़ इतोग़, “ओनाङ कय्‍कनगा मोलाना देबानु ऊळवालेवा, अगा वळ्‍न्‍ज तोग़्‍किसि ऊळवालेवा, ओसो ओना सेंकाता देबातुन कय बोयिस ऊळवालेवा, ओग़ येसुसामिये आंदोग़ इनजि नना मुर्तिय नमोन,” इनजोर इतोग़. 
पया वारममेटा पेग़्‍के, माट कग़यवालोरोम ओसो लोनलोप्पा मनेके, तोमलवने मावाय संगे मतोग़. अस्‍के तल्‍पिङ केहच तालम ईतोम मति येसु मावा नडुम वास निच इतोग़, “मीक सुकम दोर्कि, रेयमाटु!” 
पया ओग़ तोमान इतोग़, “निमा नीवा वळ्‍न्‍जतुन नावा कयदा देबातगा तोग़्‍किस ऊळा. ओसो नीवा कय इके मुनेह कीसि, नावा सेंकातगा बोयिस ऊळा. अह कीसि, निमा नमवोना लेह्‌का मनमा, मति उन्‍क-मन्‍क आयवा, विस्‍वस कीमु,” इनजोर इतोग़. 
अह कीसि “ओ नावा सामिनिन, नावा देवुळतिन!” इनजि तोमाल येसुन इतोग़. 
“निमा नाकु ऊळताह्‌कु विस्‍वस कीतिन, तोमा. मति बोर नाक ऊळवाय विस्‍वस कीस्‍तोर, ओर देय्‍वातोरु!” इनजि येसु तोमान इतोग़. 
इद सास्‍त्रमते रासववु ओसो वेल्‍लाङे बामिह कीयनाङ सीनाङ येसु मावा मुनेह कीस तोहतोग़. 
मति इव पोल्‍लोन नना बाराह्‌क रासिस तासतन इतेके देवुळबाबाल लोहतोग़ पिसिह केवाल राजाल येसुये आंदोग़, ओसो ओग़े देवुळता मग़ आंदोग़ इनजि मीट नमना. इद्रम नमतेके मीक येसुना संगे अमेसाता पिसमुळ दोर्कग़ा.