Ayuba.
39.
Ele ka kongobakɔrɔninw worotuma lɔn wa? I ka minanmuso jigitɔ ye wa? 
O bɛ karo da min kɛ ka sɔrɔ ka woro, ele ka o jate k’a da lɔn wa? Ele ka o denw worotuma lɔn wa? 
O bɛ biri le ka o ta denw woro; ni o kɛra, o bɛ bɔsi ka bɔ o ta dimi boro. 
O denw bɛ baraka sɔrɔ ka bonya o yɛrɛ ma kongo kɔnɔ; o bɛ taga o ɲanayɔrɔ ra, o tɛ sekɔ o bamuso fɛ tuun. 
Jɔn le ka kongofali labla k’a to a ye bori a sago ma? Jɔn le ka kongofaliba foni k’a to a yɛrɛ ma? 
Ne ka kongokolon kɛ a ta yɔrɔ ye, ka yɔrɔjalanw kɛ a ta so ye. 
A ta foyi tɛ dugukɔnɔyɔrɔ ta mankanw na; a tɛ sowotorotigi pɛrɛnkanw mɛn. 
A bɛ yaala kuruw kunna k’a ta domuni ɲini; a bɛ bin nugunin suguya bɛɛ ɲini. 
Yala kongomisi bɛ sɔn ka baara kɛ ele ye wa? A bɛ sɔn ka si i ta wɛrɛ kɔnɔ wa? 
I bɛ se ka juru siri kongomisi ra janko a ye sɛnɛ kɛ wa? Yala a bɛ sɔn ka misidaba sama i ye foro kɔnɔ wa? 
Yala ele bɛ sɔn ka i jigi la a kan, ko a baraka ka bon, ka i ta foro baara bɛɛ to a boro wa? 
I bɛ sɔn ka la a ra ko a bɛna i ta siman cɛ ka na ni a ye, ka na a lajɛn simangbasiyɔrɔ ra wa? 
Kɔnɔsogolon b’a kaman gbasigbasi, ka ninsɔndiya, nka a tɛ se ka wuri a kaman na i ko baninkɔnɔ. 
A bɛ a ta fanw la dugukolo kan ka taga ka o to yi, k’a to dugukolo fundɛnin ye a gban. 
A bɛ ɲina ko fɛn dɔ bɛ se ka o dɔn, ko kongosogo dɔ bɛ se ka o ci ni a sen ye. 
A tɛ hina a denw na; a bɛ i n’a fɔ a yɛrɛ ta denw tɛ. A tɛ siran ko a ka fan min la, o sɛgɛ bɛna kɛ gbansan ye, 
sabu Ala ka ale jɛn hakiritigiya ra, a m’a sɔn faamuri ra. 
Nka n’a wurira ka lɔ tuma min na ka bori damina, a bɛ yɛrɛko so ni sotigi bɛɛ ma. 
Ele le ka so ta baraka don a ra wa? Jɔn le k’a kansiw kɛ k’a cɛɲa? 
Ele le b’a to a bɛ pan i ko ɲɔdomutɔn wa? A ta fagamayakasi bɛ jatigɛ bla mɔgɔw ra! 
A b’a sengbɔgɔrɔ gbasigbasi dugu ma ka ɲagari sabu baraka b’a ra; a bɛ girin ka don kɛrɛkɛdenw cɛ ra. 
A tɛ siranya jate, foyi tɛ a ja tigɛ; hali ni a ka kɛrɛkɛmuru ye, a tɛ sekɔ kɔ fɛ. 
Kɛrɛkɛcɛ min siginin b’a kan, a bɛ o ta biɲɛforogo mankan, ani taman manamanatɔ ni biɲɛjan mankan mɛn. 
A kɔrɔtɔninba bɛ bori yɔrɔ bɛɛ; ni buru fiyɛra ka ban, a tɛ se ka lɔ yɔrɔ kelen na tuun. 
Ni buru fiyɛra a b’a fɔ: «An ye taga!» A bɛ to fɔ yɔrɔjan ka kɛrɛ kasa ta, a bɛ kɛrɛkuntigiw pɛrɛnkan ni kɛrɛkɛdenw wɔyɔkan mɛn. 
Yala ele ta hakiri le sababu ra, santigi bɛ wuri a kaman na, k’a kaman yangan ka taga fɔ woroduguyanfan na wa? 
Ele le b’a fɔ bɔn ye ko a ye wuri wa? Ele le b’a fɔ a ye ko a ye a ta ɲaga la fɔ kurujanw san fɛ wa? 
A bɛ to faraw le cɛ ra; a bɛ si o yɔrɔw le ra. A dogoyɔrɔ ye kuru jamijanw sanfɛyɔrɔw le ye. 
A bɛ to o yɔrɔ ra ka sogo dɛndɛn; k’a to fɔ yɔrɔjan, a ɲa b’a ye. 
A denw bɛ jori min; ni sogosu bɛ yɔrɔ o yɔrɔ, a bɛ yi.