Ebvu-ọma.
129.
Ẹphe mewaru mu ewere megharụ mu iya ẹka e -shi teke mu bụ nwata … Ngwa; g'unubẹ ndu Ízurẹlu tụko pfua sụ: 
Ẹphe mewaru mu ewere megharụ mu iya ẹka e -shi teke mu bụ nwata; obenu l'ẹphe te emekpeduru mu. 
Ẹphe gudewaa ẹchachi chia mu kpachacha. Ọ́nyá, ẹphe chibashịru mu l'okpurukpu dabyichaẹrupho dụ g'ẹka a warụ ọswawara. 
Obenu lẹ Chipfu bụ onye pfụberekoto. Ọ gbẹshiru bya atọo mu l'ẹgbu, ndu ẹjo-iphe shi kee mu; mu nweru onwomu. 
G'iphe, bụkpoo ndu Zayọnu dụ ashị bụkwaru ndu e-gude iphere laphu azụ. 
G'ẹphe dụkwa g'ẹswa, furu l'eli ẹswulo, abụjeru: Ọ -bya asụru evuvu; anwụ ewowaru iya chigbua. 
Ẹswa ono ahatabeje nwanshịi k'ọphu bụ l'onye jeru iya egbuta abụjeru; o -gbua nta gbua imo; o too gbutadu ẹswa, jiru iya ọbochi-ẹka; ọphu ọ bụro k'asụru upfu ẹswa. 
G'iphe, bụkpoo ndu aghata aghata ghajẹkwa phẹ iswi ekele. G'ọ to dụkwa onye a-sụ phẹ g'ọnu-ọma kẹ Chipfu bụru nkephẹ; ọzoo l'ẹphe gude ẹpha Chipfu agọru phẹ ọnu-ọma.