Ebvu-ọma.
112.
G'ajaja bụru kẹ Chipfu. Ẹhu-ụtso bẹ a gọru nụ onye atsụ Chipfu ebvu; onye ekemu iya atsọshije ụtso ike. 
Ụnwu iya a-bụru ndu ike dụ l'eliphe. Oshilọkpa ndu obu phẹ gụru ìphóró bẹ a-bụru ndu a gọru ọnu-ọma nụ. 
Iphe-enweru yẹe ẹku a-tụko ibe iya sweta; tẹme apfụbekoto iya je a-nọdu jasụ l'ojejoje. 
Mbụkponu l'ẹka agba ọchii bẹ ìphóró awajẹ g'ẹnyanwu l'ẹhu onye obu iya gụru ìphóró; mbụ onye emeje eze-iphe-ọma; bya abụru onye obu-imemini; bya abụkwarupho onye pfụberekoto l'iphu Chileke. 
Ọ bụepho k'ọma a-nọdu etso onye emeje iphe-ọma bya ejieje ụgwo mịa ya ẹnya; onye iphemiphe, oome bẹ oomeje k'ọphu aa-harụ iya enge. 
Mbụ lẹ-a; a ta abyakwa enwubata iya enwubata. Onye pfụberekoto bẹ aa-nọduepho anyatajẹ jasụ l'ojejoje. 
Ọo-nọdu anụ ẹjo nzì; ọle nzì ono ta abyadụ eme gẹ ndzụ gụa ya. Obu e-shihuje iya ike; kẹle onye ọ dakoberu bụ Chipfu. 
Obu a-kpọ iya abara; ọphu ndzụ abyadụ agụ iya; jasụ l'o gude ẹnya iya hụma l'e mekperu ndu ọhogu iya. 
Ọosaje obu iya asasa nụ ndu adụdu g'ọ dụ phẹ iphe. Apfụbekoto nkiya a-nọ jasụ l'ojejoje. Aa-tuli iya ẹka eli gude kwabẹ iya ùbvù. 
Onye ẹjo-iphe -hụma iya; ẹhu awata iya eghu eghu. L'o gude ẹhu-eghu taa kpọokpookpo jasụ l'ọ jọo ẹhu wụfu. Iphe, agụ onye ẹjo-iphe ono ta abyakwa erwu iya ẹka.