Ebvu-ọma.
83.
Gụbe Chileke; ta agbashịnu nkụchi! Sụ-a; gụbe Chileke; ba nọdushinu nggujingguji! Jiko ba adashịnu kọkoroko! 
?Ị hụmawaru gẹ ndu ọhogu ngu aphụ temutemu; waa gẹ ndu ị dụ ashị eseli ishi. 
Ẹphe gude ẹregede achị idzu ndibe ngu; mbụ achị iphe, ẹphe e-me ndu dụ ngu l'obu. 
Ẹphe epfu sụ: “Unu bya g'anyi tụko ọha ono l'ophu lwụa. G'anyi mee g'ẹpha Ízurẹlu chịhukpoepho l'ophu l'ophu.” 
Ẹphe bụru obu lanụ; idzu phẹ wụa nanụ. Ẹphe riwaru nte l'ẹphe e-me ngu ẹjo-iphe. 
Ndu ọnu-ụlo Edọmu; yẹe ndu Ishimẹlu; waa oshilọkpa Hega; waa kẹ Mówabu. 
Waa ndu Gebalu; yẹe ndu Amọnu; waa ndu Amalẹku. Ndu Filisitayinu yịkwa iya phọ; ndu Taya yịru iya. 
Tẹme ndu Asiriya bya ayịkwaru iya phọ. Ẹphe chịkoberu onwophẹ g'ẹphe bụru agbaru-ike ndibe Lọtu. 
Menaa phẹ iphe, i meru Midiyanu. Mee phẹ g'i meru Sizera yẹe Jiabinu l'ọkpa ẹnyimu Kishọnu; 
mbụ ndu ono, i meru ẹphe bụru mkpurupyata lẹ Enu-Dọru; bya emee; ẹphe reshihụ kụru l'alị; bụwaruro ikpọzu, emekwa alị. 
Menaa ndu eze phẹ iphe, i meru Orẹbu; waa iphe, i meru Zeyẹbu. Mekwaaphọ ndu-ishi phẹ iphe, i meru Zeba waa Zalụmuna. 
Mbụ ndu ono, sụjeru: “Unu g'anyi lwụa alị Chileke l'ophu lwụta nworu.” 
Jiko Chileke nkemu; menaa phẹ g'ẹphe dụ g'ẹswa ekpofu; mbụ g'ẹphe dụ g'ẹswa ereshi, phẹrephere zikashịru. 
G'ọ bụru g'ọku anọduje alwa wọowoowoo l'ọswa-a; ọzoo g'ọku etsuje úbvú-a 
bụ g'ii-nwuru phuruphuru g'oke phẹrephere chịa phẹ ọso; tẹme l'i gude oke phẹrephere ngu ono mee gẹ ndzụ rwuta phẹ. 
Menaa g'iphere ji phẹ iphu; k'ọphu ndiphe a-wata achọ ụzo, ẹphe e-shi maru ẹpha gụbe Chipfu. 
G'e meje phẹ iphe-iphere; mejeru ndzụ-agụgu ye phẹ l'iphu mkpụrumkpuru! G'ẹphe gudekwa iphere laa maa! 
G'ẹphe eshi nno maru l'ọo gụbe onye ono, ẹpha ngu bụ Chipfu ono bụ Ọkalibe-kakọta-shii lẹ mgboko mgburugburu.