Ebvu-ọma.
79.
Gụbe Chileke; hụmanu lẹ ndu ọhozo sọ-kputewaru alị ono, bụ okiphe ngu ono. Ẹphe pharwụshiwaru eze-ụlo ngu ono, dụ nsọ ono; bya emewaa Jierúsalẹmu; ọ bụru ikpọzu. 
Odzu ndu ejeru ngu ozi bẹ ẹphe wowaru tọgbogbaaru ẹnu, ephe l'eli g'o ria; mbụ l'odzu ndu dụru ngu nsọ bẹ ẹphe wowaru tụaru anụ-ẹgbudu nanụ nanụ. 
Jierúsalẹmu l'ophu gba mgburugburu bẹ ẹphe gbashịru mee nemadzụ gẹ mini; ọphu ọ dụedu onye nọkwadu nụ, e-gburu ẹja tukobe ndu ono, wụshiru ẹgube ono. 
Ndu obutobu anyi phẹ mẹ ndu bupheru anyi mgburugburu tụko ekweru anyi une bya achị anyi ọchi. 
?Bụ teke ole bẹ ẹhu e-ghuberu ngu eghu gụbe Chipfu? ?Ẹhu e-ghuwa ngu rọ eghu jasụ l'ojejoje tọo? ?Bụ teke ole bẹ okophoo ngu e-nwuberu phuruphuru g'ọku kparụ? 
Wonụru ẹhu-eghu ngu tukoshi ndu ọhozo ono, amadụ ngu nụ ono! Tukoshikwa iya phọ alị-eze ono, ete ekujedu ẹpha ngu ono! 
Kẹle ẹphe gbuwaru oshilọkpa Jiékọpu pyaapyaa; bya emebyishiwa unuphu ibe phẹ. 
Te emekwa g'anyi nwụa ọnwu iphe-ẹji, nna anyi oche phẹ meru! Phụaru anyi obu-imemini ẹgwegwa; kẹle anyi dabyiwaru mgbegere. 
Yeru anyi ẹka jiko Chileke; mbụ gụbedua, bụ onye ndzọta anyi; k'ọphu ee-shi nno kwabẹ ẹpha ngu ùbvù. Gụaru anyi nvụ l'iphe-ẹji anyi; nafụta anyi; g'ẹpha ngu apfụru! 
?Dẹnu g'o gude ndu ọhozo je a-nọduje ajị-phe sụ: “?Dẹnu ẹka Chileke phẹ nọ?” Nọdunu l'iphu anyi mee gẹ ndu ọhozo ono madzuru l'ị gwataru ụgwo ọchi ndu ejeru ngu ozi ono, e gbushiru ono. 
G'ude, ndu nọ l'ọka mkpọro atsụ rwunaa ngu nchị! Gudenụ ọkpehu ngu mee gẹ ndu e kperu mpfugbu nweru onwophẹ. 
Pfụa obutobu anyi phẹ ụgwo iphe, ẹphe meru ngu ugbo ẹsaa; mbụ iphe-iphere, ẹphe mekọtaru kpua gụbe Chipfu. 
Ọo ya bụ g'anyịbe ndibe ngu etua ngu ẹpha jeye l'ojejoje; mbụ anyịbe atụru, iiche echeche ono; mbụ l'anyi e-tu ngu ẹpha; e -shi l'ọgbo sweru ọgbo.