Ebvu-ọma.
76.
Chileke bẹ a maru amaru lẹ Jiuda. Ẹpha iya tụkowaru alị Ízurẹlu ngakọta. 
Ẹka ụlo iya nọ bụ lẹ Salemu. Ẹka o bu ebubu bụru l'úbvú Zayọnu. 
Ọo l'ẹka ono bẹ ọ nọ gbakwoshia apfụ, enwu ọku, ndu ọhogu iya shi agba. Ọ bya anyakwoshikwaphọ ogu-echi phẹ; waa iphe, ẹphe shi egbobeje gude zeeru onwophẹ; mẹkpoo iphemiphe, ẹphe shi egudeje alwụ ọgu. 
Onye akpabiri bẹ ị bụ. Ị dụ biribiri dụghata úbvú úbvú, bụ iphe, jiru iya nụ bụ anụ-ẹgbudu. 
Ndu gbaru mkparawa bẹ a kwawaru iphe phẹ ọkwata. Ẹphe kua mgbẹnya ikpazụ phẹ; ọphu ọ dụdu ndu ọkpehu dụ m'onye lanụ, dụru ike mee ẹka ụkporo. 
Gụbe Chileke kẹ Jiékọpu; ọ bụ-a mba bẹ ị barụ phẹ; ịnya phẹ; waa ụgbo-ịnya phẹ l'ophu keshiru l'ẹka lanụ. 
Ọo ngu nwẹkinyi ngu bẹ ọ gbaru g'a tsụje ebvu. ?Bụ onye a-dụ ike pfụru pfụshia ike l'iphu ngu m'ẹhu wata ngu eghu eghu? 
Gụbe Chileke; teke ị gbalihuru g'i kpee ikpe; shi nno dzọta ndu aakpa ẹhu l'eliphe; bẹ ị nọ l'imigwe bua ikpe. Alị tsụhu ngu ebvu daa nyọnyoronyo. 
Ọo ya bụ l'ọobujeru; i -tukoshi ndiphe oke ẹhu-eghu ngu bẹ aagbẹjenu tuahaa ngu ẹpha. Nwa ndu ọphu ẹhu-eghu ngu ọbu haphodoru abụru ndu akpọ egomunggo ọkpolohu. 
Ọ -bụru l'unu rifuru Chipfu, bụ Chileke unu angụ sụ l'ọwa-a iphe, unu e-meru iya; unu wotakwa iphe ọbu bya emeẹbekota iphe, unu kweru ukwe iya. G'iphe, bụkpoo ndu bupheru phẹ mgburugburu wota iphe-ọma; bya emeeru onye lanụ ono, gbaru g'a tsụje iya ebvu ono. 
Oogwerishije ọkpoma ndu-ishi egwerishi. Ndu eze ụnwu-eliphe nọdu atsụ iya ebvu.