Ebvu-ọma.
63.
Gụbe Chileke; ọo ngu bụ Chileke mu! Ọo ngu bụ onye mu anọduje ele ẹnya iya eswe l'ẹnyashi. Ẹkpiri gụbe Chileke anọduje akpọ obu mu jegirijegiri. Oghoroko ngu adụje mu l'echiẹgu; mbụ l'alị ọkponku, mini adụdu. 
Mu hụmawaru g'ike dụ-be ngu; yẹe g'ị dụ-be akpabiri; gẹ mu shi ahụmaje iya l'ụlo ngu, dụ nsọ. 
Mu e-gude ọnu mu jaa ngu ajaja; noo kẹle n-yemobu ngu ka ndzụ ree. 
Mu a-nọduje ekele ngu ekele jasụ gẹ mu a-nọ-beru. Tẹme ọ bụru ẹpha ngu bẹ mu e-gudeje chilia ẹka imeli pfuru nụ ngu. 
Obu mu bẹ ẹpho e-ji g'onye riru nri, e gude ẹba-anụ; waa ụmi ọkpu iya shia. Ọnu mu e-gudekwanụ ebvu ẹhu-ụtso, dụ mu l'ogbogboromọnu tua ngu ẹpha. 
Ọobujeru; mu -zẹe l'iphe-azẹe mu; mu anyata ngu. Ẹnyashi l'ophu bẹ mu arịkotaje kẹ nkengu. 
Mu nọ lẹ mkpula oke ǹkù ngu agụ ebvu ẹhu-ụtso. Noo kẹle ọo ngu bụ onye eyejeru mu ẹka. 
Mu anọduje ngu ntse tekenteke. Ọ bụru ẹkutara ngu bẹ gudeshi mu nụ. 
Ndu achọ ụzo, ẹphe e-shi gbua mu mebyishia ndzụ mu bẹ aa-chịru ye l'alị-maa. 
Ee-gude ogu-echi gbua phẹ pyaapyaa. Ẹphe abụru nri, a kpatarụ doberu nkụta-ọswa. 
Obenu lẹ Chileke e-me g'ẹhu tsọo eze ụtso. Iphe, bụkpoo ndu egudeje ẹpha Chileke eri angụ bẹ e-tu iya ẹpha. Ọnu ndu ntuphu-ire abụru phẹ kpụrukudukuu.