Ebvu-ọma.
46.
Ọo Chileke bẹ bụ onye anyi nọ l'ẹka ezeru ndzụ; bya abụru iya bụ ike anyi. Ọokwagebeje akwagebe eyeru anyi ẹka m'anyi nọdu eje iphe-ẹhuka. 
Ọo ya bụ l'anyi ta abyakwa l'atsụ ebvu; m'obeta mgboko gha ịgharaphu; mbụ m'obeta a pata úbvú l'ophu parụ je echiee l'echi ogbu-ẹnyimu; 
mini, nọ iya nụ phụa oke ẹphu; byaa gbulagbula byaa mebyikpọo gbụkuu-gbụkuu; k'ọphu úbvú angagbaa anganga. 
O nweru ẹnyimu ọphu dụ nụ. Mini, shi iya nụ emeje g'ẹhu tsọo mkpụkpu kẹ Chileke ụtso; mbụ ẹka dụ nsọ, Ọkalibe-kakọta-shii bu. 
Chileke nọkwa lẹ mkpụkpu iya; k'ọphu bụ l'ọ tọ dụdu iphe, byaru eme iya nụ. Nchi -bya abọhu l'ọobyawaa bya agbaarụ iya mkpu. 
Ndu ọhozo gude ẹhu-eghu aba hanyịhanyi. O mee; alị-eze phẹ nọdu angakọta anganga; ọle Chileke woliẹrupho olu gbọoru phẹ ụja; Eliphe l'ophu rwushihu. 
Chipfu, bụ Ọkalibe-Kakọta-Ike bẹ nọkwa swiru anyi. Ọ kwa Chileke kẹ Jiékọpu bụ onye anyi nọ l'ẹka ezeru ndzụ. 
Byanụ ahụma iphe, Chipfu meru! Bya ahụma g'o meru; mgboko bụru mkpurupyata! 
Oogboje ọgu l'eliphe l'ophu. Ọogba-jishije apfụ bya emebyishia arwa; bya eworu ụgbo-ịnya ọgu kpọkota ọku. 
Ọ sụru: “Unu nọdu doo; g'unu amaru l'ọo yẹbedua bụ Chileke. Ndu ọhozo a-tụ ọnu lẹ yẹbe Chileke parụ ẹka; mbụ l'aa-tụ ọnu iya l'eliphe mgburugburu lẹ ya parụ ẹka.” 
Chipfu, bụ Ọkalibe-Kakọta-Ike bẹ nọkwa swiru anyi. Ọ kwa Chileke kẹ Jiékọpu bụ onye anyi nọ l'ẹka ezeru ndzụ.