Ebvu-ọma.
38.
Gụbe Chipfu; te egudekwa ẹhu-eghu ngu baarụ mu mba! Ọphu i gudekwa oke ẹhu-eghu ngu hụ̀a mu ahụ̀hù! 
Kẹle apfụ nkengu guẹkwaru mu phọ eguru l'ẹhu; tẹme ẹka ngu nọdu apyịpyashi mu apyịpyashi. 
Ẹhu-eghu ngu meru; ọphu ẹhu mu l'ophu enwedu ẹka te emedu mu ẹhuka. Iphe-ẹji, mu meru ngu woẹrupho ọkpu mu gbaghashịa. 
Kẹle ẹjo-iphe, mu meshiru ripyabewaru mu. Ọ nọdu anyịtaberu ẹrwa k'ọphu mu adụedu ike evuvu iya. 
Onwo, aba mu nụ eshiwaa tụkuruba. Ọ bụru iphe, kparụ iya nụ bụ eswe, mu meru. 
Mu nọwa kpọyoo dẹe ẹka l'agba gụkota aphụ mkpụrumkpuru. 
Okpurukpu kwatakpọo emeshi mu ẹhuka ike; mbụ l'ọ tọ dụdu ẹka ẹhu te emedu mu ẹhuka mẹ nanụ. 
Ẹhu mu l'ophu dahuwaru adzụlakpa; tẹme obu mu tsukọtawa gworigwori. Obu te ebvuduru mu ebvuru k'ọphu bụ lẹ mu atsụshi ude ike. 
Gụbe Chipfu; iphe bụkpoo iphe, agụ mu nụ bẹ ị makọtaru. Ude, mu atsụ bẹ e te emeduru ngu lẹ mpya. 
Obu etsu mu gbudugbudu; ọphu ike adụkpoedu mu ililekpọo. Mu nọdu aphụwaa ragaraga. 
Ndu yeru mu obu; yẹe ndu mu l'ẹphe eshi ọ̀nyà bufuwaru mu iche. Ọ bụru iphe-ẹhuka, dapfutaru mu nụ kparụ iya. Ndu mu l'ẹphe bụ abụbu je apfụchaaru ụzenya. 
Ndu achọ ụzo, ẹphe e-shi gbua mu woru ọ́nyà gbakarụ mu. Ndu tụberu g'ẹphe meka mu iphe nọdu anmarụ mu ọnwu. Ọo ẹpho idzu g'ẹphe e-shi ghọoru mu ụgho bẹ ẹphe anọduje achị eswe l'ẹnyashi. 
Mbẹdua dụkwa g'onye ada nkụchi; k'ọphu bụ l'ọ tọ dụdu iphe, mu anụmaje. Mu dụkwapho g'onye ete epfudu opfu; woẹrupho ọnu mu dobe doo. 
Mu dụwaa g'onye eepfu opfu eyeru; ọphu o yedu ọnu; kẹle ọ tọ dụdu iphe, eepfu, mu nụmaru. 
Obenu l'obu mu daru ngabẹru gụbe Chipfu. Ọ bụru gụbe Nnajịuphu, bụ Chileke mu bẹ a-za mu oku, mu eku ngu. 
Mu sụru-a: “B'ekwekwa g'ẹphe teru ẹswa kpua mu! Nta-a, ọkpa chiswafuru mu-a bẹ ẹphe tụkowaru etu onwophẹ ọphushugbu.” 
Kẹle mu anga anganga; tẹme aphụ nọdu ejijeẹ mu phọ obu tekenteke. 
Mu e-pfushi ẹjo-iphe, mu meshiru ngu. Iphe-ẹji, mu meru erwukwa mu phọ l'ẹhu. 
Obenu lẹ ndu ọhogu mu dụ igwerigwe ebu jajaja; tẹme ndu mu dụ ashị l'ẹbe adụ iphe, mu meru phẹ pakwaaphọ igwerigwe. 
Ndu egudeje iphe, dụ ẹji pfụa ụgwo iphe-ọma, e meru phẹ bẹ etso mu opfu; kẹle mu anọduje achọ iphe, dụ ree. 
Ta agwọbekwa mu gụbe Chipfu! Gụbe Chileke nkemu; ba nọdukwa mu ụzenya! 
Bya ẹgwegwa bya eyeru mu ẹka; gụbe Chipfu, bụ onye ndzọta mu!