Ebvu-ọma.
17.
Gụbe Chipfu; ngabẹ nchị! Nụma arwọrwo, mụbe onye pfụberekoto arwọ ngu! Tọgbo nchị nụma mkpu, mu echi echiku ngu; l'i gbobe nchị nụma epfupfu, mu epfu anụ ngu; kẹle ọ tọ bụdu ụgho bẹ mu aghọ. 
Jiko byanụ ahaaru mu enge! Byanụ elee ya ẹnya; maru onye iswi dụ mma! 
I nyochawarụ ime obu mu; tẹme ị hụwa mu ama l'ẹnyashi; bya elerwewa mu ẹnya ọkpobe elerwe. Obenu l'ọ tọ dụdu iphe-ẹji, ị hụmaru mu l'ẹhu. Ọnu mu bẹ mu kwabẹru ẹnya g'ọ tọ dụ ẹjo opfu, e-shi iya nụ. 
A -bya l'iphe, nemadzụ emegbabe; bẹ mu mekwarụpho iphe, i pfuru; buru ụbara yeru ndu iwashị. 
Ọ bụ ọkpa, ị tọru bẹ mu anọduje etso; ọphu ọ dụdu teke ọkpa chiswafujeru mu. 
Iphe, mu gude epfu anụ ngu Chileke bụkwa l'ịingajeru mu nchị. Gbobenụ nchị; nụma olu mu! 
Jiko menaa gẹ mu hụma n-yemobu ngu ono, dụ biribiri ono; gụbe onye abụjeru; ndu -gbabarụ ngu l'ẹka je ezeeru ndzụ l'i gude ẹkutara ngu dzọta phẹ l'ẹka ndu ọhogu phẹ. 
Jịfujeru mu ẹjo-iphe; ẹgube ono, aajịfuje iphe-ọnuka g'ọ tọ rwụpya akpụru ẹnya ono. Woru mu domia lẹ mkpula ǹkù ngu; 
gẹ ndu ẹjo-iphe ta akpa mu ẹhu; mbụ ndu ọhogu mu ono, nọ-pheru mu mgburugburu eme g'ẹphe gbua mu ono. 
Imemini nemadzụ ta adụjedu phẹ; tẹme ẹphe nọdu egudeje ọnu eku onwophẹ. 
Nta-a abụjeru; ẹkameka, mu shiru; ẹphe etsophe mu; nọ-phee mu mgburugburu; eme g'ẹphe kwatsua mu. 
Ẹphe adzụgabejechaa g'agụ, ẹgu àgụ́; ọ nọdu achọ anụ, ọo-dzụ-gbu; mbụ l'ẹphe adụje g'ẹjo agụ, nmakpuru anmakpuru kwabẹru iphe e-shita iya iphu. 
Gbalihunụ gụbe Chipfu; fụaru phẹ! Menaa g'ẹphe gbushi ikpere huaru ngu ọnu l'alị! Gudenụ ogu-echi ngu dzọo mu l'ẹka ndu ẹjo-iphe! 
Gudenụ ike nkengu nafụta mu l'ẹka phẹ; mbụ l'ẹka ndu okiphe nkephẹ kpajiru l'iphe kẹ mgboko-a; mbụ ndu i meru; ẹphe nweru ẹku; nweru iya k'etsutsu iya; k'ọphu ụnwu phẹ mẹ ụnwu nwanwa phẹ e-nweru iphe nweru k'anyịnyi. 
Obenu lẹ mbẹdua bẹ e-gude apfụbekoto hụma iphu ngu. Mu -tehuẹpho bẹ ẹhu-ụtso e-ji mu obu; noo kẹle mu a-hụma ụgbugba ngu.