Ebvu-ọma.
8.
Gụbe Chipfu, bụ Nnajịuphu anyi; ẹpha ngu nyịberu anyịbe lẹ mgboko l'ophu. Gụbe onye woru ọdu-biribiri ngu dobe doghaa igwe. 
I mewaru ụnwegirima; waa ndu angụ ẹra; ẹphe wata ngu aja ajaja; m'ọbvu ndu ọhogu ngu; shi nno mee g'ọnu bụru ndu ọhogu ngu ono; waa ndu eme g'ẹphe gwata ngu ụgwo iphe kpụrukudukuu. 
Teke mu leru ẹnya l'igwe l'ophu, bụ iphe, i gude mkpụshi-ẹka ngu mee; mbụkpoo ọnwa mẹ kpokpode, bụchaa iphe, i meru ememe dobe; 
bẹ mu asụje: “?Bụ gụnu bẹ nemadzụ bụ; kẹ g'ịiri-vuje iya? ?Bụ gụnu bẹ ụnwu-eliphe, bụ kẹ g'iiletajẹ phẹ ẹnya?” 
I meru iya; ọphu iphe, ụnwu imigwe gude sengoo ya ahakpọdanu g'ẹnya-nvọ. I kpuberu iya o-gbu-nwịinwii g'okpu-eze; bya akwabẹ iya ùbvù, parụ ẹka. 
I nụru iya ike g'o letakọta iphemiphe, i meru ememe ẹnya; bya emee g'iphemiphe nọdukota iya l'ẹka; 
mbụ g'atụru; yẹe eghu; waa eswi; waa anụ-ẹgbudu g'ẹphe hakọta; 
mẹ ẹnu, ephe l'eli; waa ẹma, bu lẹ mini; mẹwaro iphemiphe, bu lẹ mini g'ẹphe ha nọdukota iya l'ẹka. 
Gụbe Chipfu, bụ Nnajịuphu anyi; ẹpha ngu nyịberu anyịbe lẹ mgboko l'ophu.