Jiobu.
26.
Tọbudu iya bụ; Jiobu bya eyee ọnu sụ: 
Lewarọ ẹgube mkpu, ịigbaru onye adụdu ike, dụ iya nụ! Lewarọ ẹgube g'i gude dzọo onye ẹka tsụhuru mẹe! 
Lewarọ ẹgube ẹguru idzu, ị chịru nụ onye amadụ iphe; mẹkpoo iphe, dụ omilomi, ị chịfutachaaru ghebe ọnu. 
?Bụ onye pfubuderu ngu iphemiphe ono, i pfukọtaru ono? ?Bụ unme onye gbẹ ngu l'ọnu pfua ya? 
Ndu nwụhuru anwụhu bẹ ndzụ-agụgu mekwarụ; ẹphe nọdu aphụ kparịkpari; mbụ ndu maa, bu lẹ mkpula mini; mẹ ndu ọphu bu iya l'ime. 
Alị-maa gbakwa ọto l'iphu Chileke. Ọla-l'iswi ghekwarụpho ọnu l'iphu iya. 
Akpaminigwe, nọ l'isheli bụ iya gbaru iya ogodo dobe; ọphu ọ dụdu l'eli iphe, ọ tụkoberu iya. Mgboko-a l'ophu bẹ o meru dobe; ọphu ọ dụdu l'eli iphe, ọ tụ-koberu iya. 
Oke mini bụ iya kpụkoru iya dobe l'urwukpu; ọphu urwukpu agbawashịhujedu. 
Ọo ya phụ-chiru atatiphu aba-eze iya; mbụ woru urwukpu nkiya phụshi iya l'eli. 
Okoke, bụ ẹnya-erwu bẹ ọ tọgbowaru l'eli eze-mini. Ono bụru okoke, ọ kparụ doberu ìphóró yẹe ọchii. 
Ọobujeru ọ -baa mba; itso, gude igwe anmaa jiijiijii tsụhu ebvu. 
Ọo ike nkiya bẹ o gude mee g'oke-ẹnyimu deru yẹkete. Ọ bụru mmamiphe iya bẹ o gude gbua Réhabu. 
Ọo unme bẹ ọ tụru atụtu; akpaminigwe nọdu ama ntụmatu ono. Tẹme ẹjo-agwọ ono, akpụ wuruwuru ono bụ iya nmafuru iya ẹpho. 
Sụ-a; iphemiphe ono hachaaru bụru iphe, oomeje; ọle ụdu iya ta adụdu ẹka o jeberu. Ọle ọ bụ; ike iya ono, adajẹ g'egbigwe ono; ?bụ ono sụru g'oo-do iya ẹnya?