Jiobu.
13.
Mbẹdua gudeakwa ẹnya mu hụmakota iphemiphe ono. Mu gudewaa nchị mu nụma iya; o doo mu ẹnya. 
Iphe, unu maru bẹ mu makwarụ-a. Ẹnya ta alwakwaru mu l'ẹka unu nọ. 
Ọle ọ dụ mu g'a sụ lẹ mu e-pfuru opfu nụ Ọkalibe-kangokọtaru-nụ. Gẹ mu lẹ Chileke l'onwiya tụa ya. 
Obenu l'unubẹdua gude ntuphu-ire eme mu nrwa pọmupomu. Unu bụkota mkpọkoro ndu eme ọbvu g'unu hakọta! 
Ọ dụ mu g'a sụ l'unu a-tụkokpoepho dobe ọnu doo; mbụ l'ono gege abụkpoerupho unu mmamiphe. 
Unu ngabẹwaro nchị nụma oke ọnu mu! Unu ngabẹ nchị l'opfu, shi mu l'ọnu! 
?Bụ unu -nọdu epfu ẹgube ẹjo-opfu ono, unu epfu ono; unu asụ l'ọo Chileke bẹ unu epfu iya etuku tọo? Mbụ-a; ?bụchakwaa ya phọ bẹ unu epfuturu opfu ẹregede ẹregede ono, unu epfugbaa ono? 
?Unu a-nọdu abọ nemadzụ ẹbo etuku iya tọo? ?Unu eme g'unu yeeru Chileke oke ọnu iya? 
?Ọo-dụ-a ree mẹ o -jeshia unu enyocha? ?Unu a-dụa ike nmaa ya phulaphula gẹ nemadzụ anmajẹ nwibe iya-a? 
Chileke bafụtajekwaru unu mba mẹ unu gude mpya lẹ mpya abọ nemadzụ ẹbo. 
?Akpabiri iya ta akabẹduru eye unu ebvu? ?Ndzụ-agụgu iya ta akabẹdu gudepyabẹ unu? 
Kpaakpaa ono, unu asagbaa ono bụkota ẹtu ẹtu, wụlahuru lẹ ntụ. Edodo, unu edo g'unu dofu iya onwunu l'ẹhu bụru edo, kwarụ l'ẹpuchi. 
Mbụ-a; unu nọdukpoekwapho doo gẹ mu pfua phee onwomu. Iphe, e-mekpọo mu nụ g'o mee! 
Mu e-tsebe ndzụ mu l'ọnu ẹta; bya atụa ndzụ mu ntụmatu. 
Ọ tọ dụkwa m'obeta ọ phụa mu aphụphu; mu adakobelẹkwa iya-a gẹ mu dakoberu iya. Mu a-pfụekwaru iya phọ l'iphu adzọ onwomu. 
Mbụ l'ọ kwa iphe ono a-bụru iphe, a-dzọta mu nụ; kẹle ọ tọ dụdu onye ta atsụdu Chileke ebvu a-dụ ike akpafụ iya l'iphu. 
Unu ngabẹkpoekwapho nchị ree nụma iphe-a, mu epfu-a! G'iphe-a, mu epfu-a bamikwa unu abami lẹ nchị! 
Lẹ nta-a, mu edowa opfu mu ishi ria bẹ mu makwarụ-a l'aa-gbaru mu ọdzori. 
?Ọ dụru onye a-bya apfụru pfua iphe, ọo-sụ lẹ mu meru? Ọ -dụwaa nno; mu a-takpụbe ọnu nwụhu. 
Sụ-a; gụbe Chileke; menaarụ mu iphe labọ-a, mu abya ngu arwọrwo-a; gẹ mu ahaa edomi onwomu edomi l'iphu ngu! 
Wofukpọe mu phọ ẹka l'ẹhu ewofu ophu. L'ị haa mu eyephe ebvu ono, iiye mu ono. 
Noo teke bụ: i -kua mu oku; mu aza ngu ẹnu. Teke ọdumeka; haa gẹ mu pfuje epfupfu g'i yejeru mu ọnu. 
?Bụ emeswe ole yẹe iphe-ẹji ole bẹ mu mekpọoru? Goshiẹshikwa mu ẹka o deru mu yẹe iphe-ẹji, mu meru. 
?Dẹnu g'o gude ọphu ịi ghadụru mu iphu; i woru mu mee onye opfu ngu? 
?Bụ mkpẹekwo, phẹrephere apa bẹ ịi-nụ chịipfuu? Tọo ?bụ ẹswa, a phụshiru l'iphe bẹ ịi-wata achị ọso? 
Noo kẹle iphe, i deshiru lẹ mu meru bụchaa iphe, rwuru mu l'anụ-mee; tẹme ị tụko ẹjo-iphe, mu meshiru teke mu bụ okorọbya byabẹ mu l'ishi. 
Ị chịru mu ọkpa ye lẹ mkpọro; tẹme ị nọdu anọduje enyocha iphemiphe, mu emekpọo ememe l'ophu; mbụ mechaa mu ọhubama l'ichirupfu ọkpa; k'ọphu ịi-majẹru ẹka mu zọru ọkpa. 
Noo g'o gude nemadzụ nọdu erwushihuje g'iphe, rehuru erehu; mbụ lẹ nemadzụ alajẹ pyẹtee g'uwe, mkpu tapyashịru.