Marcos.
15.
Do nakapaysehsehdang narana am naypapanmo sa o maato a papali kanira no adngedngeyen as kanira no eskriba as nivahod da si Jesus no kadena as kangay da nia di Pilato. 
As inahes sia ni Pilato, “Imo o patol daya no Judeo?” Tinbay ni Jesus, “Tayto mo a vatahen.” 
As aro o kaso da dia no maato sa a papali amna tominbay ava sia. 
As pirwan na sia a iyahes ni Pilato do kavata na sia, “Arava o itbay mo so vatahen daya a aro a ikaso da dimo?” 
Amna nayliliak ava si Jesus as pinaychaknin ya ni Pilato. 
Do fiesta awri a akma so chinaydadakayan da sia am mapavolaw si Pilato so asa dira do priso a pidien da. 
As mian o asa a mayngaran so Barabbas a nakalaboso do kaso no kapasolsol so golo kano kapandiman so tawo. 
As nikdaw da no tawotawo saya o kawnot dia ni Pilato o paparinyen dawri a kapavolaw so asa ka priso. 
As tinbay na sira ni Pilato, “Ichakey nio an pavolawen ko o patol nioaya a Judeo?” 
Vinata na ya do kapanmo na sia o kaynanahet da no maato a papali no pinakayapoan no niakosadoan daya sia. 
Amna pinasolsol da sa no maato a papali o tawotawo siraya do kahes da ni Barabbas a pavolawen. 
As minirwa na a vatahen ni Pilato, “Onas, ango o parinyen ko do tawo aya a tawagan so patol da no Judeo.” 
Amna minirwa sa a mangyaw a makavata sia, “Papasken do kros!” 
Vatan sia ni Pilato, “Onta, ango marahet a pinarin na.” Amna no nakapaypaliak da a mangyaw nia, “Papasken do kros!” 
As do kakey na a mapakamia sira am pinavolaw na dira si Barabbas as tayoka na ipaymando dira do sinjalo o kayiplot di Jesus am pinarawat na sia dira a papasken da. 
As chinaro da sia no sinjalo a iyangay do sahad do palasio as kakpeh da sira o asa ka batalion a sinjalo. 
As pinawnayan da sia so mavaya as kapamarin da so korona a kamanolok as kapangay da sia do oho na, 
as kasitnan da sia a itek a makavata sia, “Aniven a patol da no Judeo!” 
As niplotan da sia no viawo do oho na as katipa da dia as kadogod da a toman omanib sia. 
Do nakatayoka da a omtek nia am pinakaro da dia o mavaya awri a laylay as kapavidi da so adan naw a lamit as kakaro da nia a iyangay a papasken do kros. 
Navayat da si Simon a iCyrene a ama da Alejandro kani Rufus a tayto omodi a yapo do takey a iya so pinosposan da a mayrara so kros nawri ni Jesus. 
As inangay da sia do logar ori a tawagan da so Golgota a mayinmonmoan so Logar no Yanga no Oho. 
As tinorohan da so inomen na a palek a pinasaglan so mira am ininom nava. 
As do nakapapasek dawri sia am pinayatay da o lamit na sira do kapaysoswerte da dia. 
As do nakapapasek da sia am masngen o alas nueve. 
As no nakatolas a inakosan dawri sia am, “Patol da no Judeo.” 
As pinapasek da pa sa o dadwa a ka manakanakaw a mayviit sia do kawananan na sia kan do kaholian na sia.  
As nakatongtong o nakatolas a kavata na sia, “Nachividang sia dira do makagatogatos.” 
As sira o minhavas sirawri am nitek da as kapaylilinlin da a makavata sia, “Hoy, an ara imo o makararayaw ori so templo as kapirwa mo sia do tatdo a karaw, 
am librien mo o karakohan mo as kagtin mo do kros moaya!” 
As aran sira o maato a papali am nitek da do kavata da sia do kadwan dira kanira no eskriba sawri, “Nilibri na sa o kadwan as malibri nava o karakohan na! 
An ara iya o somnivog a Mesias as patol no Israel am agtinyay na tapian makapanganohed ta.” As aran sira o rarayay nawri a pinapasek am nitek da pa sia. 
Do ka alas dose no kamaraw a manda do alas tres am naysasari do kavahayan aya. 
As do ka alas tres am nangyaw si Jesus a makavata sia, “Eloi, Eloi, lama sabaktani.” No inmonmoan na nia am, “Dios ko, Dios ko, ango o paychanoanolayan mo diaken.” 
As no vatahen da no kadwan sawri daw am, “Tayto na tawagan si Elias.” 
Nyeng a mayayo o asa dira a manghap so espongha a pinatneb do silam as kapangay da sia do totok no viawo a ipatodo do vivi ni Jesus do kavata na sia, “Tiban ta pa an mawara si Elias a omlibri sia!” 
As nangyaw si Jesus so maliak as kadiman narana. 
As no kortina ori do templo am nayara a mapirit do tohos a manda do kagtin. 
As no apohen dawri no sinjalo a nakavoya so nakadiman na am vinata na, “Somnivog sawen ya a Manganak no Dios!” 
Mian pa sa daw o mavavakes a maytalamad do marayi ori. Machividang sa dia sa Maria Magdalena, si Maria a ina da Jose kani Santiago as kani Salome. 
Sira ya am minonot sa di Jesus do kayan na do Galilea a mayserbi dia. As mian pa sa o aro a mavavakes a nachivan dia do Jerusalem. 
As do kamakoyab narana do araw aya a kapayprepara do araw no kapaynaynehah, 
am nawara si Jose no Arimatea a asa ka aniven a membro no konseho ori kano asa sia a ompanapanaya so kawara no Dios a maypatol. Naynyengdet a mangay di Pilato a omahes nia ivovon o karakohan ori ni Jesus. 
As naychaknin si Pilato do nakadngey na so nakadiman narana ni Jesus as tinawagan na o apohen ori no sinjalo as kahes na nia dia an ara dana nayendes a nadiman. 
As do nakapanmo na sia do apohen awri o nakadiman narana am pinya na si Jose a omahap sia. 
Pinagtin na o karakohan ori ni Jesus as kapongos na dia no lamit a sinadiw na as kapangay na sia do asa ka vovon a pinarin do asa ka bato a akmay achip as kapamadede na dia so bato o pantaw no vovon awri. 
As navoya da ya da Maria Magdalena kani Maria a ina ni Jose o nivovonan naya sia.