Salmo.
37.
Salmo ni David. Parinyen moava o mararahet sa so kaparin a tomoroh so lijat do aktokto mo as kan ichaynanahet mo sava, 
takwan akma sayay dibobot a makalo a mabo as kano mohamoha a makalo a mahayo. 
Ichasaray mo o Dios as kapakapsek mo do kadwan tapian maviay ka do tana aya a abo so ichamoamo. 
Parinyen mo o Dios a pakayapoan no kasoyosoyotan mo as itoroh na anti o atavo a ichakey mo. 
Parawaten mo o viay mo do Dios as kaiya no ichasaray mo, ta iya o somidong dimo. 
No Dios o ompatalamad nia o kapayanong no pinarin mo a akma so sehdang do kamaraw. 
Makaynaheveb ka as kapakarakoh mo so pasinsia do kapanaya mo so sidong no Dios as ichaynanahet mo sava o mararahet saya so parinyen an omasenso sa. 
Maket kava as kan mavakel kava ta ichapia moavawri. 
Sira o machidepende do Dios am sira o maviay do tana aya a abo so ichamo asna sira o makagatogatosen am kastigoan na sira.