Egvu Sólomọnu.
2.
Mu dụ l'ọ bụ igu oshi, nwuru kfụu lẹ nsụda Sharọ́nu; mbụ l'ọ bụ okfukfulike, nọtsua lẹ nsụda ugvu. 
Ọ bụ ẹge ono, ọobuje okfukfulike yẹle ogvu nọnyabe; yọ kakọta ogvu mma ono; bụ ẹge onye ono, nọ mu l'obu ono akakọtaje mma l'ẹke ụnwu-mgbọko ọdo nọ. 
Ọ bụ ẹge ono, oshi-ọmi lanụ akangoje iphe bụ oshi, nọ l'ọswa ono bụ ẹge nwoke ono amị-ngoje ụnwu-okorọbya ọdo. Ọoduje mu mma tẹ mu nọdu l'agu iya; yeru l'akpụru iya anọduje atsọ mu ẹna. 
O dutaru mu jeshia l'ẹke aagba ajị. Ẹkwa-ọhubama, o yeru mu abụru n-yemobu. 
Gude akpụru vayịnu, a mịru amịmi mee tẹ ike dụ mu. Nggu egude ụdara mee tẹ mu shihu ike; kẹ l'obu ngu dụshi mu ike. 
Ẹka-ibyita iya b'o yeru mu l'ishi; bya egude ẹka-ụtara iya rụkota mu. 
Unubẹ ụnwanyi Jerúsalemu; unu kwee mu ụkwa l'unu ta akpatsudu n-yemobu jeye teke ọo-bya; kẹle n-yemobu bẹ bụkwa ẹge eedo umoro; mẹ mgbada bẹ eedo iya. 
Ngabeduduphu! Ọ kwa olu nwoke ono; bẹ mu anụ ẹge ono! Lenu! Oogude nwọso; swewa eze ugvu ugvu; mẹ ụnwu ugvu ugvu l'agbakfuta mu. 
Nwoke ono dụkwa l'ọ bụ umoro; mbụ l'ọ bụ nwele. Oovudokwa l'azụ oshi-ẹpoto ayi; pyofu ẹnya lẹ windo l'enyo swọringu. 
Nwoke ono sụkwaru mu: “Tẹ mu gbeshi mụbe onye nọ iya l'obu; tẹ mụbe onye ẹgiri iya; tsoru iya! 
Kẹle oge winta sweekwaru; mini achị-buhuwa. 
Oshi atsụakwa igu lẹ mgboko. Oge egvu ruakwaru; kparakobe araakwaa. 
Oshi figu wataakwaru amịmi. Mkpọ igu oshi vayịnu emee ẹkemeke ọbule; yo shi kwẹkwekwe. Gbeshi; nggụbe onye mu yeru obu! Ọnya mu; gbeshi t'ayi je!” 
Nggụbe nwa ndo mu, nọ lẹ mgbaku ikelegvu mkpuma; domia onwungu l'ogvu eli ugvu; Byiko menua tẹ mu phụ ngu ifu; kfururu okfu yeru mu; kẹ l'okfu ngu atsọje mu ẹna; atatifu ngu l'ama ntụmatu. 
Nwụkooru ayi uphẹgu ono; mbụ ụnwu uphẹgu ono, emebyishi vayịnu ono; kẹle vayịnu ayi atsụakwa igu. 
Nwoke ono bụ nke mu; mbẹdua abụru nk'iya; mbụ onye ono, eche atụru iya l'ẹke okfukfulike tsuru etsuru ono; 
gbururu jeye lẹ gbẹregbede urẹnyashi teke nwonyonyo ta nọhedu. Nggụbe nwoke ono; byiko; kfụkwaa bugengu-bugengu lakfuta mu ẹge ono, umoro; mẹ ele akfụje l'ugvu, dụ nkwọgodo-nkwọgodo ono.