Ẹtu.
28.
Ẹjo madzụ anọduje agba ọso; l'ẹ bọ dụ onye achị iya nụ. Obenu l'onye doberu ẹka ndoo; bẹ obu eshihuje ike l'ọ bụ agụ. 
Mba -watawa okwefu íkè; ẹphe awata ọgba-nweshi ndu ishi ẹphe ẹka ẹka. Obenu l'onye, maru iphe; nweru egomunggo bụru ishi; obu egvuru ndu ọochi egvuru. 
Onye ishi, akpa ndu ụkpa ẹhu; dụkwa l'ọ bụ mini, chịkoru iphe e meberu l'alị kpota. 
Ndu jịkaru ome iphe a tụru l'ekemu; kwa ndu ẹjo iya ono; bẹ ẹphe l'ẹphe bụ ike. Obenu lẹ ndu eme iphe a tụru l'ekemu bụ ndu eme iphe dụ ẹji bẹ ẹphe enwufu. 
Ndu eme iphe dụ ẹji iphe vudo nhamụnha te edojedu ẹnya. Ọ bụ ndu maru Ojejoje; b'o dokotaru ẹnya ọhuma. 
Onye ụkpa, eme ire-lanụ; kakwa mma mẹ l'onye nweru iphe; l'arụ ụrukutu. 
Nwa, emeje iphe a tụru l'ekemu bụkwa onye, maru iphe. Obenu l'onye yẹle ndu ẹkpiri ayị; bụ iphe-iphere b'o me ekpu nna iya. 
Onye gude ọ-mụru-nwa l'akpa ẹku kwa onye aphụru ndu ụkpa imiko; bẹ ọokpa ẹku ọbu edoberu. 
Onye jịkaru lẹ ya te medu ekemu bẹ ekfukfu, ookfu anụ Nchileke abụjeru Nchileke akpamara. 
Onye du onye, obu gụru iphoro; shilahaa ẹjo ụzo; kwa onye ọbu a-nma l'ọnya, ọ gbaru. Obenu l'onye ẹ-te emedu iphe aata iya ụta; e-keta òkè l'iphe-ọma. 
Onye nweru iphe; etubesuje lẹ ya maru iphe. Obenu l'onye ụkpa, egomunggo ruru alị a-vọfuta iya-a. 
Onye doberu ẹka ndoo -bahụ l'ọchichi; ẹhu atsọlahaa ndiphe. Ẹjo madzụ -bahụkwanu iya; ndiphe achọlahaa ẹke ẹphe e-domi onwẹphe. 
Onye akpami ẹjo iphe, o meru akpami; b'ẹ t'ọ dụjekwaru lẹ mma. Obenu l'onye kọshiru iphe o meru; haa ya ememe; bẹ aaphụjeru imiko. 
Ọnu-ọma bụ k'onye atsụ Ojejoje egvu. Obenu l'onye kpọ-chiru ọkpoma e-je iphe-ẹhuka. 
Ọ bụ ẹge agụ, ede ekiri; m'ọ bụ bịye, abọ erumu dụ; bụ ẹge onye gude akirishi achị ndu ụkpa dụ. 
Onye ishi, gude ike achị; bẹ te nwedu egomunggo. Obenu l'onye ẹku, eegude ụgho akpa dụ ashị bẹ a-ka nka. 
Onye gburu ọchi; ọchi ono gude iya; bẹ a-nọdu aghalẹphu kpata phungu jeye teke ọo-nwụhu. T'ẹ b'ọ dụkwa onye a-gbaru iya mkpu. 
Onye eme iphe, ụta ta dụduru iya; ta dụkwa iphe eme iya nụ. Obenu l'onye arụ ụrukutu; a-kpọ-buhukwa; daa. 
Onye eseshi akanya ike; e-nwe nri; nwee ya k'etsutsu. Obenu l'onye adabujeru l'omephe iphe ẹ-ta agadu mkpa; bẹ a-bụru ụkpa-mkpẹre. 
Ọnu-ọma, tso onye ire-lanụ ahajẹ nshinu. Obenu l'onye achị ẹku l'ike; te erighakwaru iya. 
Ọbo madzụ ẹbo ta dụkwa mma. Obenu lẹ madzụ emeswejelekwaa l'okfu nri. 
Onye ụkparaswi bụ iya; bẹ onweru iphe ka agụgu; ọphu ọomadu l'ọkpa ụkpa eche iya echeche. 
Onye, baru onye mesweru nụ m̀bà; bẹ onye ono, a baru m̀bà ono e-mekochaa maru l'ọ ka iya ome ọhuma; mẹ l'onye ọphu bụlephu ajaja eli-ọnu b'ọ jajẹ iya. 
Onye ezitaje iphe nna iya; m'ọ bụ kẹ nne iya; sụ: “L'ẹ tọ bụdu ome ẹji” bẹ yẹle onye mmebyi bụkwa iphe lanụ. 
Onye nchamẹnya akpalije okfu. Obenu l'onye dakoberu Ojejoje; bẹ ọo-dụru lẹ mma. 
Onye chịru ụkfu kwẹe onwiya bụ onye eswe b'ọ bụ. Obenu l'onye gude mmamiphe eme iphe ta dụdu iphe eme iya nụ. 
Onye anụje onye ụkpa iphe; bẹ ụko taa kọdu. Obenu l'onye aphụje ndu ụkpa woru ẹnya lọpyia; bẹ aa-dụ l'igwe kọo ọnu. 
Ẹjo madzụ baa l'ọchichi; ndiphe edomishilahaa onwẹphe. Obekwanu lẹ ndu ẹjo iya ono -kpolashihu; ndu doberu ẹka ndoo aka l'igwe.