Ẹtu.
26.
Ọ bụ ẹge aka-mini, daru l'oge ọnanwu ta agadu mkpa; mbụ ẹge mini, chịru teke aakpa nji ta agadu mkpa; bụ ẹge ọkwabe onye eswe ugvu ta gbakwaphu. 
Ọnu, e buru onye ẹ-ta dụdu iphe o meru dụkwa l'ọ bụ onye aatụ nwẹnu, ephe ephephe iphe: ọ -tụa; yọ tụ-swee ya. 
Ẹchachi bẹ eegudeje agọ ịnya; mkpa bẹ eegudeje agọ nkakfụ-ịgara; ndu eswe abụru mgbọro; bẹ eechije ẹphe l'okpurukpu-azụ. 
Be eyekwaru onye eswe ọnu lẹ mkpọkoro okfu, ookfu. Ọdumeka; bẹ nggu l'iya a-tụkokwa bya abụru ndu eswe. 
Yekwaaru onye eswe ọnu lẹ mkpọkoro okfu, o kfuru. Ọdumeka; bẹ oo-tubesukwa lẹ ya maru iphe. 
Onye ezi onye eswe ozi dụkwa l'ọ bụ onye ebu onwiya achị; l'anụ onwiya nshi. 
Ọ bụ ẹge ọkpa, akụ onye ngvụru lakpalakpa ta dụdu mkpa, ọoga; bụ ẹge ẹtu onye eswe anma ta gadu mkpa. 
Ugvu, a kwabẹru onye eswe dụkwa l'ọ bụ mkpuma ụrobo, meru mbu-l'ẹka-ụta. 
Ẹka onye eswe anma ẹtu dụkwa l'ọ bụ ẹke onye mẹe atsụ akpa onwiya ógvú l'ẹka. 
Onye butaru onye eswe; m'ọ bụ o-shi-awe-o-shi-awe t'o jeeru iya ozi dụkwa l'ọ bụ onye agba akfụ gude iya l'emekakota madzụ iphe. 
Ọ bụ ẹge nkụta alajẹ azụ bya eria ẹnwa, ọ nwaru; bụ ẹge onye eswe abụje: o -mee mkpọkoro iphe; yọ la iya azụ. 
Mbu; ?Ị phụru nwa ọ-maru-ọmachata? Onye ono bẹ onye eswe kakwa mma. 
Onye ẹnyiru sụru l'agụ nọ lẹ woroworo; l'ẹjo agụ tsoru iphe bụ ụzo adzọ-phe. 
Ọ bụ ẹge ibo anọduje aswọ-phe l'iphe e gude gbaa ya bụ ẹge onye ẹnyiru anọduje aghaswashị l'oshi-azẹe ya. 
Onye, ẹnyiru tsụru ụwomini abụje o -tsuta ụtara l'ophe; yọ kpọo ya agụfuta ye l'ọnu. 
Onye ẹnyiru arịje lẹ iya ka ụmadzu ẹsaa, maru oye ọnu l'okfu ọmaru iphe. 
Onye esweta esweta; je eye ọnu l'okfu, ẹ tọ madụ ishi iya; dụ l'ọ bụ onye jeru je awọru nkụta lẹ nchị. 
Onye eduswe ibe iya ụzo; sụ l'ọ bụ okfu bẹ ya ezi iya 
dụkwa l'ọ bụ itsọku; mẹ ẹjo akfụ, onye ọgvu gude eme mbẹreshi. 
Nkụ -anọdu l'ọku; ọku anyịhu. Ntụmatu -laa; ụswo alaa. 
Ọ bụ ẹge icheku emeje ọku; yọ gbanwuhu; m'ọ bụ ẹge nkụ emeje ọku; yo nwulihu; bụ ẹge onye okfu akpalije okfu. 
Okfu-azụ atsọjekwa ntụmatu; mbụ l'ọotukoje ẹhu vọo kfụrukfuru. 
Ọ bụ ẹge ẹremete okfu azẹ-mije ọkpoma nshi; bụ ẹge eegudeje nshị mkpọla-ọcha kpụ-mia ite-ụra. 
Onye madzụ dụ ashị egudeje okfu-ọnu zẹ-chia onwiya. Obenu l'ime obu iya; bụ ẹregede nọ iya; 
m'o -ruhuduru okfu iya atsọ ịtsagha. Be eyekwaru iya ọnu; kẹ l'ụruburuku, nọ iya l'ọkpoma rukwaru ẹsaa. 
Ashị, madzụ dụ iya; bẹ oogudeje ụgho domia. Obenu l'iphe dụ ẹji, oome; bẹ ee-mekocha-a tụa too l'edzudzu ọha. 
Onye egwu iduma; bụ iya e-mekochaa dalahụ iya. Onye eswi mkpuma; bẹ mkpuma ono e-welata azụ bya eswipyabẹ. 
Onye ẹjo-ire akpọje ndu, oomeka iphe l'ẹhu ashị. Ọ kwaphụ ẹge ono; bẹ ajaja eli-ọnu emebyije iphe.