Ẹtu.
24.
Be ejikwaru ndu ẹjo madzụ ijimẹnya; ọphu nggu l'ẹphe 'ayịkwa. 
Kẹ l'iphe anọje ẹphe l'obu bụ iphe kpangangangu. Iphe eshije ẹphe l'ọnu abụru ẹge ee-shi kpata okfu. 
Ọ bụ mmamiphe; bẹ eegudeje akpụ ụlo; bụru iphe-odo-ẹnya; bẹ eegudeje mee ya; yo shihu ike. 
Ọ bụ iphe-odo-ẹnya; bẹ eegudeje gude ngwa-ụlo, ere ire; l'ama mma dojia ime ụlo. 
Onye maru iphe kakwa onye ike nọ ike. Onye ẹnya ruru alị aka onye agburu-ẹhu. 
Onye eje ọgu; bẹ mkpa onye nzizi dụkwaru. Onye ọ dụ t'o mekputa l'ọgu; achọo igweligwe ndu a-nọdu akpọ-ziru iya ụzo. 
Mmamiphe kwa ẹka 'eru onye eswe. Ọ -nọdu l'ẹke ọha dzuru l'obu-edukfu; b'ẹ to kfudu okfu. 
Onye nọ l'ẹjo idzu; bụ iphe aa-nọdu eku iya bụ o-me-njọ. 
Idzu, onye eswe chịtaru abụjekwanuru iphe dụ ẹji; ọphu onye ụru-ọnu 'adụjedu madzụ mma. 
Ẹka -kụfu ngu l'oge iphe-ẹhuka; bụkwa iphe ọ bụ; bụ l'ị rụhuru arụhu. 
Dzọfutakwa ndu a kpụ eje egbugbu; nggu alọlata ndu akpọ galagala ala ẹke ee-gbu ẹphe azụ. 
Ị -sụ l'ẹ tọ gbasadụru ngu; onye ono, enyoje obu madzụ ono; ?o nweru iphe ẹ tọ madụ. Onye ono, bụ iya eche ndzụ ngu ono; ?ịiri l'ẹ tọ madu iphe iime tọo. Ọo-kfụnu onyemonye ọbule ụgwo l'ẹge iphe onye meru dụ? 
Rije manụ-ẹngu; nwa mu; kẹ l'ọ dụ mma. Mbụ lẹ manụ-ẹngu, e metaru l'ẹbaku-ẹngu a-tsọ ngu ẹna l'ọnu. 
Makwarụphu l'ọ bụ ẹge ono bẹ mmamiphe dụ mma lẹ ndzụ ngu; Ị -chọ-vu iya; bẹ ụzo ifu ngu a-dụru ngu lẹ mma; ọphu iphe ono, iile ẹnya iya ono 'arụhudu. 
Be ejekwa je akwaa ngge l'ọ bụ ẹjo madzụ t'i je egwo iphe l'ụlo onye doberu ẹka ndoo; ọphu iijekwa ọgu ọ-lụa-ọlaa lẹ nk'iya! 
Ishi iya abụru l'onye doberu ẹka ndoo -daa; m'ọ daru ugbo ole; bẹ oo-gbeshikwa. Obenu l'ẹjo madzụ; bẹ ndakfu a-dakfuta. 
Be etekwa ẹswa l'onye ọhogu ngu daru; ọphu ẹhu atsọjekwa ngu ẹna l'ụkfu kpọru onye ọhogu ngu; 
k'ọphu ẹ to ghudu Ojejoje eghughu; yọ haa ya ome iphe ọ ga eme iya. 
T'iphe ndu ẹjo iya ono eme; be emejekwa t'ẹhu wata ngu ọ́phù àphụ̀phù; ọphu ejijekwaru ndu ẹjo madzụ ijimẹnya. 
Kẹ l'ẹjo madzụ; te nwedu iphe oo-le ẹnya iya. Ọku a-nyịhuru iya; yọ wụshi ọwa. 
Nwa mu; tsụjekwa Ojejoje egvu; nggu atsụjekwaphu onye eze egvu. Be etsokwa ndu ekwefuru ẹphe íkè; 
kẹle Ojejoje yẹle onye eze ono bẹ e-mekwa tẹ kpurupyata tụ ngu ọtu-l'ụkfu; ?Bụ onye maru egbe ọdachi, ẹphe e-gude dakfu ngu. 
Ndu ọwaa bụkwaphu okfu onye mmamiphe: Ole madzụ ẹnya l'ifu l'ekpe ikpe ta dụkwa mma. 
Mbụ l'onye sụru onye ikpe nmaru l'ọo ya bẹ iswi dụ mma bẹ ndiphe e-gudekwa nmaa ẹjo ẹtu; iphe bụ mbakeshi avụaru iya pyịi. 
Obenu lẹ ndu ikpe; nma iya onye ọ nmaru; bẹ iphe a-dụru lẹ mma; Ndu ono bẹ aa-gọru ọnu-ọma, ha nshinu nụ. 
Onye yeru ọnu l'okfu ẹge gbaru nụ ekoshi lẹ ya bụ ọkpobe ọnya ngu. 
Vuru ụzo jeodu ozi, nọru ngu nụ l'alị; tẹmanu nggu ejee ozi, nọru ngu l'ẹgu; tẹmanu nggu awata ọkpu ụlo ngu. 
Ba agbakwaru madzụ ibe ngu ẹjo ekebe; ọphu i gudekwa ọnu ngu duphua madzụ. 
Ba asụkwa l'ii-melata madzụ iphe o meru ngu; gude kfụa madzụ ụgwo iphe o meru. 
Mu swejeru ẹke onye ẹnyiru kọru okfu; je aghajaa ẹke onye ẹ-te nwedu egomunggo kọru vayịnu. 
Iphe furu l'ẹke ono abụru ọgarama-mbo. Ẹke ono abụkotaru ẹgbudu. Mkpuma, e gude gbaa ya ụpho; adakashịhuhwa. 
Mu abya awata ọri iphe ono, mu phụru ono; bya egude iya mụta iphe. 
L'ọ kwa: mgbẹnya -rota ngu; nggu asụ l'ọo t'i ekutota iya nwanshị. Nggu achịru ẹka ye l'ụtakfu; l'ọo t'ị tụta ume. 
Ị -bya ele ẹnya; ụkpa afụaru ngu l'ọ bụ onye onye abalị-d'egvu byaru nk'iya; ụkpa atụ ngu gbirimu l'ọ bụ onye onye iphura, chị ngwa-ọgu byakfutaru.