Ẹtu.
22.
Ọkpobe ẹpha kakwa oke ẹku. Ugvu aka mkpọla-ọcha; mẹ mkpọla-ododo. 
?Bụ ngụnu jikoru onye nweru iphe; mẹ onye ụkpa. Ọ bụ Ojejoje keru ẹphe ẹbo. 
Onye nweru egomunggo aphụje iphe-emeka; zeeru iya. Obenu l'onye egomunggo swehuru ejeje dukpudukpuu je adalahụ l'iphe-ẹhuka. 
Obunggo, etsoje onye dụ agu; l'atsụ Ojejoje egvu bụ iphe-enweru; ugvu; mẹ nka. 
Iphe nọ l'ụzo ẹjo madzụ bụ ógvú; mẹ ọ́nyà. Obenu l'onye eche ndzụ iya nche ebujeru ụba yeru iphe ono. 
Zụfuta nwata l'ụzo, oo-shi; o -vufutalephu; tọo hadu iya. 
Onye ụkpa bụ ohu onye nweru iphe. Onye ji ụgwo abụru ohu, onye ooji ụgwo. 
Onye wotaru ẹjo ikpe dzabẹ l'ọ bụ oshi kwa iphe-ẹhuka; bẹ ọo-wọta; egvu, aatsụ iya alaa. 
Ọnu-ọma bụ k'onye bụ o-me-l'uko; kẹle ookejeru ndu ụkpa nri iya. 
A -chịfu onye ụru-ọnu; okfu alaa; ụswo; mẹ ọko-ọnu agvụ. 
Ọ bụ onye obu gụru iphoro; okfu iya adụ bẹlebele; e-shitaghe eze ọnya. 
Ojejoje arụbeje ẹnya lẹ mmamiphe. Obenu l'okfu onye ẹ te gudedu ire iya ẹka; bẹ oomeje t'ẹ b'ọ dụ iphe ọo-bụ. 
Onye ẹnyiru asụje: “L'agụ nọkwa l'etezi. Lẹ ya -lụfu; bẹ ọo-tagbukwa iya l'esu-ụzo.” 
Ọnu nwanyi, eri ogori kwa iduma b'ọ bụ; Onye, a-dalahụ iya nụ; kwa onye kpatsuru Ojejoje iwe. 
Umere ụnwegirima; bụ umere ụnwegirima. Obenu l'ọo ẹchachi, bẹ eegudeje hụzita iya. 
Onye adzọ ndu ụkpa ọkpa l'ishi; k'ọphu ya a-ka onweru iphe; mẹ onye, bụ ndu nweru iphe; bẹ ọonuje iphe; e-mekochakwaa bụru onye ụkpa. 
Ngabẹ nchị; nụa okfu onye maru iphe; nggu ezia obu l'iphe mu ezi ngu. 
Kẹ l'ọo-dụru ngu lẹ mma; m'i woru iya ye l'ọkpoma; chịru iya l'ẹka tekenteke; 
k'ọphu obu ngu a-nọ l'ẹke Ojejoje nọ; Mu meekwaru t'o doo ngu ẹnya ntanụ; nggụbedua l'onwongu. 
Mu deekwaru ụkporo ẹtu l'ẹtu iri doberu ngu. Ẹtu ono bụ ẹtu, a-nọdu alọ ngu ẹka lẹ nchị; l'ezi ngu mmamiphe. 
Ọ bụ ẹtu, a-nọdu ezi ngu iphe bụ ire-lanụ; bụru ẹtu, ii-dakobe; k'ọphu ịi-maru iphe ịi-nọdu edoru onye ziru ngu nụ. 
Be egudekwa kẹ lẹ madzụ bụ onye ụkpa; naa ya iphe o nweru. Ọphu iimejekwa t'ẹnya nyịhu onye ẹ te nwedu ẹge ọ harụ iya l'ụlo-ikpe; 
kẹle Ojejoje e-mekochakwa-a gbaaru ẹphe ọdzori; nalata ndu ono ụgwo iphe ono, ẹphe narụ ẹphe ono. 
Tẹ nggu l'onye obu-ọku; be eshikwa ọ̀nyà; ọphu nggu l'onye ẹhu-ọnwuu 'ejekwa ayịyi; 
e menyaa; yo chia ngu umere iya ono; nggu eshi ẹge ono baa l'ẹnu, ẹ tị tụdu. 
Ba anajẹkwa madzụ mkpalẹka; ọphu ịinodukwaru madzụ l'itumo; 
kẹ l'i -nwedu iphe ii-gude kfụa ya; bẹ aa-pakwa paa paa oshi-azẹe ngu. 
Ba afọfukwa ékpè, e gude kpaa oke-alị l'oge ndiche. 
?Ị phụru onye ọru iya doru ẹnya ọhuma. Ọ bụ onye ono bụ onye e-jegheru ndu eze ozi. Ẹ too jegheduru ndu ẹ ta madu ẹpha ẹphe ozi.