Ẹtu.
13.
Nwa, maru iphe anụje iphe nna iya ekfuru iya. Obenu l'epherephere; ta angajẹdu nchị lẹ mba, aabaru iya. 
Madzụ egudeje ọnu kfutaru onwiya iphe-ọma. Obenu l'onye ẹ te gudedu ire iya ẹka; bụ k'ẹhuka bụ iphe anọduje agụ iya. 
Onye afọ okfu, ookfu afọfo bụ ndzụ iya b'o che nche. Obenu l'o-kfu-lẹ-njakọnu; e-mekochaa laa l'iyi. 
Onye ẹnyiru; bẹ ẹkpiri anọje; ọbu l'ẹ tọ dụdu iphe eru iya ẹka. Obenu l'onye akanya; bẹ iphe agụ iya nụ eruje ẹka. 
Onye doberu ẹka ndoo; bẹ ẹjo-ire adụje ẹji. Obenu l'ẹjo madzụ bụ iphe-iphere; bụru iphe aakpọfu akpọfu. 
Onye ụta ẹ-ta dụdu l'ẹhu iya; bụ odobe-ẹka-ndoo anọduje eche iya nche. Obenu l'ẹjo madzụ; bụ ẹjo iphe iya ono enwutsuje iya. 
O nweru onye anọduje eme l'ọ̀ bụ eze madzụ; a ma l'ẹ to nwedu ẹge ọ ha iya. Nweru onye anọduje eme l'ọ̀ bụ onye ụkpa; a ma l'o nweru iphe; nweshia ya ike. 
Madzụ egudeje ẹku, ọ kpataru gbata ndzụ iya. Obenu l'onye ụkpa; ta dụdu iphe eyeje iya egvu. 
Onye doberu ẹka ndoo dụ l'ọ bụ iphoro; ji ẹke ọ nọ. Obenu l'ẹjo madzụ; dụ l'ọ bụ urọku, bụ: ọ -nọnyaa; yọ nyịhu. 
Oku onwonye ekuku; bụ ụswo b'ọ kpatajẹ. Obenu lẹ mmamiphe; bụ ndu, kweru t'a kpọ-ziaru ẹphe ụzo. 
Okpoga, e gude ụgho dzuta anọduje ala azụ azụ. Obenu l'onye gude ẹka iya; tọo nwẹhu kpaa okpoga emeje iya; yọo ka nshinu akaka eje. 
Iphe madzụ leru ẹnya iya; e mekochaa to ruhe iya ẹka; bẹ emeje tẹ meji nmafụ iya. Obenu l'iphe agụ madzụ -rua ya ẹka; b'ọ dụje iya l'ọ bụ oshi, anụ ndzụ. 
Onye aalọ ẹka lẹ nchị; to nwe iphe ọ gụberu iya achọkwaru onwiya ishi-ephuhu. Obenu l'onye eme iphe ekemu kfuru bẹ obunggo iya nọkwaru. 
Iphe onye maru iphe ezi; dụkwa l'ọ bụ ẹke mini, anụje ndzụ futaru. Oomeje tẹ madzụ ba ada l'ọnya, anwụhu gbarụ. 
Onye, nweru egomunggo; bẹ adụje ndiphe l'obu. Obenu l'ụzo onye ẹ te gudedu ire iya ẹka adụjeru iya ẹhuka. 
Onye nweru egomunggo egudeje mmamiphe eme iphe oome. Obenu l'onye eswe ewotaje ome-eswe iya ono tụa jalangụ. 
Ẹjo nwozi akpatajẹru madzụ iphe-ẹhuka. Obenu l'ozi, e ziru onye, e gude ire iya ẹka; bụ ẹhu-agu b'ọ nụje. 
Onye, aahụ̀ àhụ̀hù; tọ nga nchị; bẹ ụkpa abyajẹkwaru; iphere egude iya. Obenu l'onye aahụ̀ àhụ̀hù; yọ nụa ya; bẹ aakwabẹje ugvu. 
Iphe agụshi madzụ ike -rube iya ẹka; bẹ ẹhu atsọje iya ẹna. Obenu l'onye eswe; bẹ ọotsuje l'ẹhu ọha ẹjo iphe. 
Onye yẹle ndu mmamiphe ayị; a-bụru onye maru iphe. Obenu l'onye etso ndu eswe; ejeje iphe-ẹhuka. 
Iphe-ẹhuka anọduje achị ẹjo madzụ ọso. Obenu l'ụba; bụkwanu obunggo onye doberu ẹka ndoo. 
Ọkpobe madzụ akpajẹ ẹku d oberu nwanwanwaranwa iya. Obenu l'ẹjo madzụ bụ ndu doberu ẹka ndoo; b'ọ kpajẹ ẹku edoberu. 
Onye, bụ onye ụkpa; bẹ alị iya a-nọdu emehuru iphe. Obenu l'e gudeje ẹjo ikpe; kpefu iya alị ọbu l'ẹka. 
Onye ẹ-ta ahụ̀dù nwatibe iya ahụ̀hụ; kwa ashị bẹ nwata ọbu dụ iya. Obenu l'onye yeru nwatibe iya obu ezije obu l'alị l'àhụ̀ iya. 
Onye doberu ẹka ndoo erijije ẹpho. Obenu l'ẹjo madzụ bẹ ẹgu emeje.