Ẹtu.
6.
Nwa mu; ọ -bụru l'ị narụ madzụ ibe ngu mkpalẹka; wowaru onwongu yeru madzụ l'itumo l'ụgwo, onye ọdo ji iya; 
ọ -bụru l'iphe ono, i kfuru ono bụwa ọnya; hata ngu; okfu ono, shi ngu ọnu ono abụru ụgbu kota ngu; 
ọwaa iphe ii-me; nwa mu; gude gbata onwongu; keshinu ị dalahụwaru obutobu ngu l'ẹka: Jelekwaphu je agwọtohuru iya; rọo ya jeye teke ii-rọ-buta iya. 
Be ekukwa mgbẹnya; ọphu i kwekwa tẹ mgbẹnya roru ngu; 
l'ẹ ba bụ l'i dzọfuru onwongu l'ọ bụ mgbada nyịkufuru onye achị nta l'ẹka. Mbụ l'ọ bụ nwẹnu, nmaru l'etse; nọ nyaa; shi iya nahụ. 
Jeduduphu ẹke ụnwehu nọ; nggụbe onye ẹnyiru! Gbua igo l'iphe ẹphe eme; gude iya maru iphe. 
Ụnwehu te nwedu onye ishi; to nwe onye eleta iya nụ; l'ẹke ọono eje ozi; te nwe onye achị iya nụ. 
Obenu l'ọobuje; o -rua l'ọnanwu; yọ kpaa nri dobe. 
?Bụ teke ole; bẹ ịi-zẹ ẹge ono zẹ-bebe; nggụbe onye ẹnyiru? ?Bụ teke ole bẹ ii-tehu lẹ mgbẹnya? 
Ịisuje l'ọ kwa t'i kua mgbẹnya nwanshị; mbụ-a t'i dobe nwishi l'oshi; tụta ume; 
jeye teke ẹjeka a-bya azụ ngu gbirimu l'ọ bụ ndu ana nfụ; ụkpa-mkpẹre afụaru ngu l'ọ bụ abalị-d'egvu. 
Mkpọkoro madzụ; mbụ ẹjo madzụ bụlephu ụru-ọnu; bẹ oogudeje aghaphe. 
Ọoji-bujeru madzụ ẹnya; yo gude ọkpa l'eme iphe-ọhubama; gude ẹka l'eduphu ibe iya. 
Oogudeje ẹregede l'agba iphe a-tsụru madụ. Iphe ọonoje abụru ọkpata okfu; 
Ọ bụ iya kparu iphe iphe-ẹhuka a-tụ iya l'ụkfu; iphe a-byaru iya nụ anyaa ya kpoo; k'ọphu bụ l'ẹ-tọ natadụ ọgvu. 
O nweru uzi iphe ishingu, dụ Ojejoje ashị; mbụ ụzo iphe ẹsaa bụ iya akpamara. 
Iphe ono bụ: ọ-ka-onwonye-mma-l'ẹnya; ntuphu-ire; ogbu onye ẹ-ta dụdu iphe o meru; 
ọriri ẹjo iphe; ọgba perepere ome iphe dụ ẹji; 
obobe madzụ ibo; mẹ onye egudeje okfu kpakaa ufu madzụ. 
Nwa mu; tsojekwa ụzo, nna ngu kpọ-ziru ngu; ọphu ị hajẹkwa ome iphe nne ngu ezi ngu. 
Kee ya kpụkpurukpu l'obu; nggu atụkua ya onwongu l'olu; 
kẹ l'ị -je ije; bụ iya a-nọdu edu ngu. Ị -ku mgbẹnya; bụ iya a-nọdu eche ngu nche. I -mụru ẹnya; yoo kfu anụ ngu. 
Kẹ l'ụzo-wa, a kpọ-ziru ngu-a kwa urọku; iphe eezi ngu abụru iphoro. Mba, aabaru; gude l'alọo ngu ẹka lẹ nchị abụru ụzo ndzụ. 
Ọ bụ iya e-nwufuje ngu t'ẹ b'ị dalahụ nwanyi, eri ogori l'ẹka; bụru iya e-me tẹ nwanyi, bụ o-dephua-ikoro; be egude ire-machamacha deta ngu. 
Tẹ mma, ọoma; be emekwa t'ọ wata ngu agụgu. Ọphu i kwekwa t'o gude ẹnya derita ngu! 
Nwanyi ọkpara emeje nwoke; tọ dụhe iphe ọo-bụ. Nwanyi, eri ogori abụru ishi ndzụ ngu bẹ ọonoduje achị nta iya. 
?O nwekpooru madzụ nwigbaleke-ọma, a-vọta ọku wụshi l'ọkpoma tẹ ọku ọbu be eke uwe iya? 
Mbụ; ?o nweru onye e-je ije l'eli icheku-ọku; tẹ ọku bẹ eke iya ọkpa. 
Ọ bụ ẹge ono b'ọ dụ onye yẹle nyee onye ọdo azẹ. Ẹ to nwekwa onye denyiru nyee madzụ ẹka a-la kẹ mmanu! 
Onye zitaru iphe ria; l'ẹke ẹgu agụ iya; b'ẹ ta akwatajẹkwa gụbe ọkpobe iphura; 
Obekwanu l'e -gude iya; bẹ ọo-kfụ ụgwo iphe ono, o zitaru ono ugbo ẹsaa; m'o -ruhuru; o refu iphe o nweru kfụa ụgwo iya. 
Nwoke, eri ogori te nwekwa egomunggo; kẹ l'ọ kwa onwiya b'o mebyishi emebyishi. 
Uru, oo-rita iya bụ l'ee-tsu iya iphe; meru iphere ye iya l'ifu; ọphu iphere iya ta abyadụ bya agvụ iya agvụgvu l'ẹhu. 
Kẹ l'ọ bụ okopho-nwanyi akpalije nwoke ẹhu-eghughu. Ẹ tọo phụjekwaru onye rarụ nyee ya imiko; m'ọ -bya iya ome iphe. 
Ẹ t'ọ dụdu iphe e gude bya iya arọro, ọo-nata; m'o -ruhuru; ọ ha ịhagha.