Ẹtu.
3.
Nwa mu; ba azahakwa iphe mu ezi ngu. Wotakwa iphe ono, mu ezi ngu ono ye l'obu; 
kẹ l'ọ kwa iya e-me t'ị kaa nka; mekwaaphu t'ẹhu dụ ngu agu. 
Be ekwekwa tẹ n-yemobu yẹle ire-lanụ nahụ ngu. Tụ-kpua ya l'olu l'ọ bụ iphe-olu; nggu edee ya edede l'obu ngu; 
k'ọphu ịi-tụba Nchileke l'obu; tụba madzụ l'obu; ẹpha ọma abụru nke ngu. 
Gude obu ngu l'ọ ha dakobe Ojejoje; Ba achịkwaru ụkfu kwẹe lẹ mmamiphe k'ẹka ngu. 
Tẹ Ojejoje vutajekwaru ngu ụzo l'iphe bụ iphe iime ememe; kẹ l'oo-me ụzo ngu t'ọ kfụru gbororo. 
Ba abụkwa nwa ọ-maru-ọmachata. Tsụ-jechia Ojejoje egvu; nggu aghaaru ẹjo iphe azụ. 
Ono bụ iphe e-me t'ẹhu dụje ngu npho; mekwaaphu tẹ ọkpu shihu ngu ike. 
Gude ẹku ngu kwabẹ Ojejoje ugvu. Nggu egude iphe ọdungu, ị kpataru l'iphe i meberu l'alị; kwabẹ iya ugvu. 
Teke ono; ọba ngu eji ejiji; mẹe ọphungu eji mbenu ngu. 
Nwa mu; ba agwọkwa àhụ̀hù, Ojejoje àhụ̀ ngu lẹ ntụ; ọphu ike 'agwụkwa ngu lẹ mba, ọ baru ngu; 
kẹ l'ọ kwa ndu Ojejoje yeru obu; bẹ ọobajeru mba; ẹge ono, nna abajẹru nwatibe iya ọphu o yeru obu ono. 
Ọnu-ọma kwa k'onye chọru mmamiphe; chọ-vu iya; mbụ onye iphe edoje ẹnya. 
Ishi iya abụru lẹ mmamiphe kakwa mkpọla-ọcha. Ọ kwaphu ẹge ono; bẹ uru, nọ lẹ mmamiphe ka kẹ mkpọla-ododo. 
Ọ ka mkpuma, vu oke aswa ìrè. Ẹ to nwekwa iphe agụ ngu enweru, nweru ọphu ka mmamiphe. 
Iphe nọ iya l'ẹka-ụtara bụ nka; ọphu nọ iya l'ẹka-ibyita abụru ẹku; mẹ ùgvù. 
Iphe nọ l'ụzo iya bụ ẹhu-ọtso-ẹna; bụru ẹhu-agu jiru esu-ụzo iya. 
Ndu rụkuru iya ẹka; bẹ ndzụ edzuje; ndu gbakụru iya nụ abụru ndu a gọru ọnu. 
Ọ bụ mmamiphe; bẹ Ojejoje gude tọo ntọ-l'alị mgboko; gude iphe-odo-ẹnya mee igwe. 
Ọ bụ mmamiphe iya; b'o gude mee tẹ mini ẹnyimu wata atsọtso; mẹ tẹ iji, shi l'urukpu ghọo mini; wata achịchi. 
Nwa mu; gudeshikwaa ọkpobe mmamiphe ike; nggu amakwarụphu ẹge ii-shije l'eye ọnu l'okfu. Be ekwekwa t'ọ nahụ ngu. 
Ọ bụ iya a-bụru ngu ndzụ; bụru ákà, ịi-nya l'olu gude l'emema onwongu; 
k'ọphu ụzo ngu a-bụru ngu chịriri-lẹ-werere; ụkfu ta adụ ngu; njị ta ajị ngu. 
Teke ịize azẹe; tịi tsụdu egvu; mgbẹnya ngu abụru l'ẹhu-gudangu. 
Ẹ tịi tsụdu egvu iphe-kpaa; tịi tsụ egvu teke ndu ẹjo iya ono e-kpolashihu; 
kẹ l'ọo Ojejoje a-bụru mgbaru-ike ngu; bụru iya a-nọdu edu ngu t'ẹ b'ị nma l'ọnya. 
Ba anafụjekwa madzụ iphe dụ mma, gbaru iya nụ; m'ọ -bụru l'ọo nggu b'ọ nọ l'ẹka ememe. 
Ba asụjekwa madzụ ibe ngu t'ọ bya echile bya iya anata; l'ẹke iphe ọbu nọkwa ngu-a l'ẹka teke ono. 
Ba achịjekwa idzu iphe a-tsụru ibe ngu; mbụ onye nggu l'iya tụsaru onwunu ẹhu. 
Be ekobejekwa madzụ okfu ìphòró; l'ẹbe adụ iphe o meru. 
Be ekojekwaru onye eme iphe-kpaa okopho; ọphu i yekwa ọkpa l'ẹke o yeru; 
kẹ l'onye eme mkpako-mkpako adụjekwa Ojejoje ashị. Obenu l'onye obu gụru iphoro; bẹ Ojejoje atụjeru obu yeru. 
Ụlo ndu akirishi; bẹ Ojejoje tụakwaru ọnu. Obenu l'ufu ndu doberu ẹka ndoo; bẹ ọogojeru ọnu. 
Ndu aja ndu ọdo ewena; bẹ Ojejoje ajalatajẹkwa. Obenu lẹ ndu dụ agu; b'o mejeru eze-iphe-ọma. 
Ndu maru iphe b'a kwabẹje ugvu; obenu l'ọo iphere abụjeru kẹ ndu eeswe.