Ẹtu.
1.
Ẹtu, ọ nmashịru; mbụ Sólomọnu Dévidi, bụ eze ndu Ízurẹlu. Iphe meru iphe o gude nmashịa ẹtu ono bụ: 
k'ọphu madzụ e-gude iya maru iphe; shi iya dụje ike lọ-gude onwiya; k'ọphu okfu, dụ ogvu e-doje iya ẹnya; 
mẹ k'ọphu madzụ e-nweru egomunggo; zije obu l'alị eme iphe; bụru onye doberu ẹka ndoo; l'eme iphe vudo nhamụnha; 
k'ọphu ndu ẹ-te nwedu egomunggo e-nwe iya; ụnwu-okorọbya akwaa ẹnya; ẹnya erua ẹphe alị. 
Tẹ ndu maru iphe ngabẹ nchị mụtafua iphe yekwaru l'ọphu ẹphe mahawaru; ndu elerutaje ẹnya l'iphe akabaa ya elereta; 
k'ọphu ẹtu; akalị-okfu; okfu ndu nweru mmamiphe; mẹ l'ilu e-doje ẹphe ẹnya. 
Ọ kwa ọtsu Ojejoje egvu bụ ẹke mmamiphe dụberu. Obenu lẹ ndu eswe ta dụdu iphe ẹphe agụbeje mmamiphe; tọ dụ iphe ẹphe gụberu àhụ̀hù. 
Nwa mu; ngabẹjekwa nchị teke nna ngu akpọ-ziru ngu ụzo; ọphu ịijikajekwa iphe nne ngu ezi ngu; 
kẹ l'okfu ẹphe ono a-bụru okpu; mee ishi ngu t'ọ dụ ugvu; bụkwaruphu ịyagba-olu, e-mee ngu; nggu abụru ẹgiri. 
Nwa mu; teke ndu eme ẹjo iphe eme t'ẹphe deta ngu; be ekwekwa. 
Ẹphe -sụ ngu t'ị bya etsoru ẹphe; t'unu je ekee l'ụzo; gbua madzụ; mbụ t'unu je akwabẹru ndu ẹ-ta dụdu iphe ẹphe meru l'ụzo; 
t'unu lee ẹphe lẹ ndzụ ẹge ili, eleje odzu; mbụ lee ẹphe wọo l'ọ bụ ndu wụlahuru l'iduma; 
ẹphe -sụ ngu l'unu e-gwo igweligwe iphe, vu oke aswa; gude iphe unu kwaru l'ọkwata dojia ụlo unu; 
ẹphe -sụ ngu: “T'ị tụru ẹka yeru ẹphe; ẹge nggu l'ẹphe a-gbaru mgba l'okpoga ẹphe nataru;” 
nwa mu; be tsokwa ẹphe! Be yekwa ọkpa l'ụzo, ẹphe esh; 
kẹ l'ọ kwa ome ẹjo iphe; bẹ ẹphe anọduje agba perepere iya; to nwe iphe ẹphe gụberu ogbu madzụ. 
L'agwọ madzụ, phụru l'ẹnya ta atajẹkwa iya. 
Ndu-wa kwa onwẹphe; bẹ ẹphe kwabẹru t'ẹphe gbua; ọ kwa onwẹphe bẹ ẹphe kwaru l'ụzo ẹge ono. 
Ọ kwa ẹge ono; bẹ ọo-dụru ndu gude ẹnya-ọku l'achọ uru. Uru, e ritaru ẹge ono egbujekwa onye ritaru iya nụ. 
Mmamiphe tsoru mgbadamgba l'echi mkpu. Ọ nọ l'echi edukfu l'echi mkpu. 
Oovudo l'ishi ụzo l'echi mkpu; nọdu l'obu-edukfu mkpụkpu l'araru iya ndu ọha arara; sụ: 
“?Bụ teke ole; bẹ unubẹ ndu ẹ-te nwedu egomunggo a-ha ome eswe? ?Bụ teke ole; bẹ ọchi ndu ọdo ọchi a-tsọ-buhu ndu achị iya nụ ẹna; mmamiphe adụ-buhu ndu eme eswe ashị. 
Unu ngabẹ nchị lẹ mba, mu abaru unu; k'ọphu mu e-koshi unu uche mu; mee t'unu maru iphe nọ mu l'obu. 
Obenu lẹ keshinu mu kuru unu oku; unu ajịka azaza; to nwe unu onye yeru mu ọnu teke mu machịru unu ẹka; 
wota iphe mu akpọ-ziru unu baa l'alị; unu te kwe ọnata mba, mu abaru unu; 
bẹ mu e-mekochakwaa chịa unu ọchi teke ụmuruku a-mụru unu. Mu a-ja unu ewena teke unu a-nọdu eje ntakfuru; 
mbụ teke oke ndakfu a-pata unu l'ọ bụ oke phẹrephere; mbụ teke ọtu-gbirimu nmadẹru unu swọkoswoko l'ọ bụ ọku-maa; mbụ teke ono, ụtsuruku a-tsụ unu ono. 
Teke ono; bẹ unu e-ku mu; mu ta aza unu. Unu e-le ẹnya mu; unu ta aphụ mu. 
Lẹ keshinu ọphu mmamiphe dụ ẹphe ashị; ẹphe ta hata ọtsu Ojejoje egvu; 
keshinu ẹphe te ekwedu tẹ mu kpọ-ziaru ẹphe ụzo; woru mba, mu abaru ẹphe wụa l'alị; 
bẹ ẹphe e-mekochakwaa ria uru ẹjo ụzo, ẹphe etso; rijia ya ẹpho; 
kẹ l'ọ bụ ụzo, ndu ẹ-te nwedu egomunggo shisweru; bụ iya e-gbu ẹphe. Yọ bụru ẹnya ndu eme eswe, jiru onwẹphe e-me; ẹphe abụru ndu ọ-la-l'iyi. 
Obenu l'onye ngabẹru yẹbe mmamiphe nchị; ta dụdu iphe eme iya nụ. Ẹhu a-dụ iya agu; ọphu ọ byadụ bya atsụ egvu iphe-ẹhuka.”