Egvu-Ọma.
148.
Unu jaa Ojejoje ajaja. Unu shi l'imigwe jaa Ojejoje ajaja. Unu nọdu l'ẹke kagee l'eli jaa ya ajaja. 
Unubẹ ụnwu ojozi iya l'unu ha; unu jaa ya ajaja. T'iphe bụ ndu sọja imigwe; jaa ya ajaja. 
Unu jaa ya ajaja; unubẹ ẹnyanwu; mẹ ọnwa. Unu jaa ya ajaja; unubẹ mkpọ-kpodo, egbu zamụzamu. 
Unu jaa ya ajaja; unubẹ akpamigwe; mẹkpo unubẹ mini, nọ-ngoru akpamigwe anọ-ngo. 
Unu tụko l'unu ha jaa Ojejoje ajaja; kẹ l'ọ bụ iya sụru t'unu nọdu; meru iphe unu nọ. 
Ọo yẹbedua dobetsuaru unu l'ẹke unu a-nọdu. Yọ bụru ẹke ono, o dobetsuaru unu t'unu nọdu ono; bẹ unu nọtsua. Yọ bụru ẹke ono; bẹ unu a-nọ jeye lẹ tutu yoyo. Iphe ono, ọ tọru ọkpa iya ono te nwedu l'o chihuru echihu. 
Unu nọdunu lẹ mgboko jaa Ojejoje ajaja; unubẹ iphe dụtsua biribiri, o meshiru dobe l'eze ẹnyimu; mẹ ọphu nọtsua lẹ mini ime-alị. 
Unu jakwaaphu Ojejoje ajaja; unubẹ egbe-igwe; mẹ aka-mini; mẹ urukpu; mẹ oke phẹrephere, emeje iphe o kfuru. 
Unubẹ oke ugvu; mẹ ugvu kẹ nshịi; iphe bụ oshi-ọmi; mẹ iphe bụ oshi sida; unu jakwaa ya phụ ajaja. 
Tẹ anụ-ẹgu-ẹgbudu: iphe bụ elu; ụnwehu; mẹ ụnwenu, ephe l'eli; unu tụko jaa ya ajaja. 
Unubẹ ndu eze kẹ eliphe ọwaa; unubẹ iphe bụ mbakeshi; unubẹ ndu ishi; mẹ iphe bụ ndu achị mgboko l'ọ ha; 
unubẹ ụnwu-okorọbya; unubẹ ụnwu-mgbọko; unubẹ ndu bụ ọgurenya; mẹ ụnwegirima; unu jajẹkwaa ya phụ ajaja. 
Unu tụko l'unu ha jaa Ojejoje ajaja; kẹ l'ọ bụ ẹpha iya nwẹnkinyi bụ ẹpha, kakọta nụ. Ọdu-biribiri iya swetaru mgboko mgburumgburu bya esweta imigwe. 
O meru tẹ onye ike dụ lụfutaru ndu nk'iya. Onye ono bẹ ndu Ízurẹlu, bụ ndu yeru iya obu anọduje aja ajaja; mbụ ndu ono, nọ iya l'obu ono. T'ajaja bụru kẹ Nchileke.