Egvu-Ọma.
142.
Ẹ́vù, Dévidi raru teke ọ nọ l'ọgba ekfu anụ Nchileke Mu chiru mkpu chishia ya ike chiku Ojejoje. Mu chikuru Ojejoje; t'ọ phụaru mu imiko. 
Mu wotaru mkpu, mu echi wụshiru iya; wota iphe-ẹhuka, mu l'ọ ha tọgboru iya. 
Teke ike agvụwa mu agvụgvu; bẹ nggụbedua bọru mu ụzo. Ndiphe gbashịleru mu phụ ọnya l'ụzo t'ọ nma mu. 
Lewa mu rụ ẹnya l'azụ; nggu aphụ l'ẹ t'ọ dụdu onye akpa mu ishi. Mu te nwedu ẹke bụ: mu -gbaba iya; mu anọdu iya zee ndzụ; kẹ l'ẹ tọ dụdu onye akpa mu ishi. 
Yọ bụru nggụbe Ojejoje bẹ mu chikuru; sụ: “Ọ bụ l'ime ngu; bẹ mu anọduje ezeru ndzụ; bụru nggu bụ òkè-iphe mu l'alị ndu nọ ndzụ.” 
Ngabẹnu nchị; nụa mkpu, mu echi; kẹ l'o nweru iphe atsụ mu l'ẹhu. Byiko; nafụtanu mu l'ẹka ndu achị mu nụ; kẹ l'ẹphe ka mu ike. 
Gbafụtanu mu lẹ mkpọro-a, mu nọ-wa; k'ọphu mu a-ja ngu ajaja; ndu doberu ẹka ndoo anọ-phee mu mgburumgburu; kẹ l'i yeru mu ẹnya nshinu.