Egvu-Ọma.
132.
Egvu, aagụje teke eeje Jerúsalemu Nggụbe Ojejoje; nyatanu Dévidi; nggu anyata iphe-ẹhuka, o jeberu. 
Ọ gụru ẹnwa; ria nte l'ifu Ojejoje; mbụ ribua l'ifu Ọkaribe kẹ Jékọpu: 
“Lẹ ya ta atụdu ọkpa l'ụlo iya; ishi te eru iya l'oshi; 
ya te ekwe tẹ mgbẹnya bya iya l'ẹnya; mbụ t'ẹnya mee ya gadzụgadzu kẹ mgbẹnya; 
jeye ya aphụa ẹke a-bụru kẹ Ojejoje; mbụ ẹke Ọkaribe kẹ Jékọpu e-buru.” 
Ayi nụwaru l'ọ nọ lẹ Efuratu; tụgbua je aphụa ya lẹ mgbẹgu Kiriyatu-Jerimu. 
Ayi asụ: “Unu t'ayi jenu l'ụlo-ẹ́kwà Nchileke. Unu t'ayi jenu je anọdu iya l'ọkpa; baaru iya ẹja. 
Gbeshinu; nggụbe Ojejoje; bya l'ogbodufu ngu; nggu lẹ Okpoko Ọgba-ndzụ ngu ono, ekoshi ẹge ike ngu habe ono. 
Tẹ ndu achịjeru ngu ẹja yenua odobe-ẹka-ndoo l'ọ bụ uwe. Ndu yeru ngu obu agụa egvu ẹhu-ọtso-ẹna.” 
Gudenu okfu ẹhu Dévidi, bụ nwozi ngu nyata onye ono, ị wụru manụ l'ishi gude mee ya; yọ bụru eze ono. 
Ojejoje riburu Dévidi angụ; mbụ angụ, ẹ ta amịngadu amịnga; to nwe l'ọo-nọnyaa; to vuhedu ire. Ọ sụru iya: “L'onye lanụ lẹ awa ngu bẹ ya e-me t'ọ nọdu l'aba-eze ngu. 
Ọ -bụru l'ụnwu ngu doberu ndzụ, ẹphe l'iya gbaru; l'eme iphe ya tụru l'ekemu; ọo ya bụ; l'ụnwu ẹphe a-nọwaru l'aba-eze ngu gbururu jeyewaru.” 
Ojejoje gudewa ẹka iya fọta Záyọnu; kẹ l'ẹke ono dụ iya mma tẹ ya buru iya eburu; kẹ l'ọ sụru: 
“Ọ bụ ẹke-a; bẹ ya e-me ufu iya jeye lẹ tutu yoyo; bụru l'ẹke-a bẹ ya e-dobe aba-eze iya; kẹ l'ọ bu ẹge ọ dụ iya mma ndono. 
Ya a-gọru ọnu nụ iya t'o nweru iphe nweru k'etsubo iya. Ndibe iya ndu ndu k'ụkpa; bẹ ya a-nọdu anụ-ji ẹpho. 
Ndibe iya, achịjeru Nchileke ẹja; bẹ ya e-ye ndzọfuta l'ọ bụ onye yeru uwe. Ndibe iya, yeru Ojejoje obu a-gụ egvu ẹhu-ọtso-ẹna. 
Yọ bụru ẹke ono; bẹ ya e-shi l'ọnu-ụlo Dévidi; nụ onye lanụ ike; mụru ọku ye l'urọku onye ya wụru manụ l'ishi gude chia ya eze. 
Ya e-me t'iphere gude ndu ọhogu iya. Obenu lẹ yẹbedua; bẹ ya e-kpube okpu-eze, acha pemu-pemu.”