Egvu-Ọma.
95.
Unu bya t'ayi gụa egvu ẹhu-ọtso-ẹna gude jaa Ojejoje! Unu t'ayi tụa ụzu ẹhu-ọtso-ẹna gude kwabẹ iya ugvu; mbụ onye ono, bụ Agbara-Mkpuma, adzọfutaje ayi ono! 
Unu t'ayi gude egvu ekele bya l'ifu iya! Unu t'ayi gude egvu-ọma meeru iya uzere! 
Kẹ l'ọ bụ Ojejoje, bụ Nchileke; bụru onye eze, kakọta iphe bụ ọmarali, nọ mgboko-a nshinu. 
Ọ bụ yẹbedua bẹ mgboko mgburumgburu nọ l'ẹka. Iphe bụ oke ugvu abụru iya nwe iya. 
Eze Ẹnyimu bụ nk'iya; kẹ l'ọ bụ iya meru iya. Yọ bụru iya gude ẹka iya meta ọgbodo-alị ọkponku. 
Unu bya t'ayi fozita; baaru iya ẹja; t'ayi byishiru Ojejoje ono ikpere, bụ iya meru ayi ono; 
kẹ l'ọ bụ iya bụ Nchileke ayi. Ayịbedua abụru ndu ooche l'ọ bụ onye eche atụru; mbụ ụnwu atụru, nọ iya l'ẹka. Ọo ya bụ; teke unu nụru olu iya ntanụ ọwaa; 
unu ba anmakwa ọkpoma kpụ-gbungu ẹge unu nmaru iya lẹ Meriba; mẹ ẹge unu nmaru iya lẹ Masa l'echi-ẹgu; 
mbụ ẹke ono, ndiche unu phẹ nọru hụa Nchileke ama bya adatakwa iya phụ; l'ẹphe gudetsua ẹnya ẹphe phụ iphe ya meru. 
Ụkporo afa ẹbo mgburumgburu; bẹ ọgbo ono kpatsukotaru iya iwe. Ya asụ l'egomunggo sweshihuru ẹphe; ọphu ẹphe 'ekwedu oshi ụzo, ya koshiru ẹphe. 
Tọ dụ iya bụ; ya egude ẹhu-eghughu ribua ya: “L'ẹphe ta abahụdu l'ẹke ya nọ; tụta ume.”