Egvu-Ọma.
90.
Ekfukfu, Mósisu onye kẹ Nchileke kfuru nụ Nchileke Nggụbe Ojejoje; keshinu k'ede-nwede; bụ nggu bẹ ayi nọhawa l'ẹka. 
Tẹmanu tẹ ugvu ugvu nọdu; mbụ tẹmanu t'i mee eliphe; mẹ mgboko; b'ị bụha Nchileke; bụru Nchileke ono; bẹ ịi-bụ jeye lẹ tutu yoyo. 
Iimeje tẹ madzụ ghọo ẹja. Ịisuje ayi t'ayi nwụhu; ghọo ẹja ọdo. 
Kẹ l'ụnu afa labụ l'ụkporo afa iri dụle ngu-a l'ọ bụ ujiku lanụ; mbụ l'ọ bụ nwa-njibu-ẹnya l'ẹnyashi lanụ. 
Iigudeje anwụhu kpofu madzụ l'ọ bụ onye kpofuru ẹswa; kẹle madzụ dụ l'ọ bụ iru ẹwu. 
L'ụtsu; bẹ ọonoduje aja pulapula. O -be l'urẹnyashi; yọ kpọo nkụ; kụlashihu. 
Oke ẹhu-eghughu ngu adzụwa ayi l'ọ bụ ọku; Ẹhu-eghughu ngu mewaru ayi; meji atọshihu ayi. 
Ẹjo iphe ayi meshiru; b'i doru ayi giriri l'ifu. Ẹjo iphe ayi meru l'edomi; b'i mewaru t'ọ daburu ngu ẹba l'ifu. 
Ndzụ ayi mgburumgburu bụlephu oke ẹhu-eghughu ngu ejije iya. Ndzụ ayi l'ọ ha abụjelephu ude ude. 
Iphe ayi anọ-beje bụ ụkporo afa ẹto l'afa iri. Ọ -bụru onye karu nka; yọ nọo ụkporo afa ẹno. Obenu l'iphe ejije iya nụ; abụkotaje iphe-ẹhuka; mẹ aphụ. Ọphu o nwedu ẹge aanọ-beje; yọ bụru iya ayi. 
?Bụ onye maru ẹge ẹhu-eghughu ngu shihuberu ike. ?Bụ onye b'o doru ẹnya; mbụ ẹge oke ẹhu-eghughu ngu habe nshinu; k'ọphu ọo-nọdu atsụ ngu egvu? 
Menua tẹ ayi maru ọnu-ọgu ụboku ayi lẹ mgboko; k'ọphu ayi e-shi iya maru iphe. 
Nggụbe Ojejoje; tụshihuru ọkpoma. Egbe iphe ọwaa; ?bụ teke ole b'ọ nọ-behunu? Phụnuaru ayịbe ndu ozi ngu imiko! 
Tẹ n-yemobu ngu jijenu ayi ẹpho l'ụtsu; k'ọphu ayi a-nọduje agụ egvu; l'ete ẹswa teke ayi nọkwadua ndzụ. 
Menua t'ẹhu-ọtso-ẹna ayi yẹle iphe-ẹhuka phụ, i meru; ayi ejee phụ hakọ. Menua tẹ afa ẹhu-ọtso-ẹna ayi yẹle afa olemole phụ, ayi taru chịchichi phụ; dụgbalephu. 
Menua tẹ ayịbe ndu ozi ngu; phụ iphe iimeshi; nggu emee t'ụnwu ayi; phụ ẹge ike ngu dụ-be biribiri. 
Menua t'ayi tụba ngu l'obu; nggụbe Nnajiufu, bụ Nchileke ayi. Menua t'iphe bụ iphe ayi byiberu ẹka bụru ayi ụpete. Iyee! Mee tẹ iphe bụ iphe ayi byiberu ẹka nweru ishi.