Egvu-Ọma.
74.
Ẹ́vù, Ásafu raru Nggụbe Nchileke; ?bụ ngụnu kparu iphe ị zaharu ayi k'ojejoje ẹge-a? ?Bụ ngụnu kparu iphe i wotaru ẹhu-eghughu ngu kpukpobe ndu nke ngu ẹge-a? 
Nyatakwa igwe ọha ono, ị kfụru aswa ishi ẹphe l'ede-nwede ono; mbụ ọkpa-ikfu ono, ị gbataru l'itumo; mee ẹphe; ẹphe abụru nke ngu ono. Nyatakwa Ugvu Záyọnu ono, i bu ebubu ono. 
Jeduduphu je aphụ ẹge e mebyishiru iya; mbụ ẹge ndu ọhogu meru ụlo ngu ono, dụ nsọ ono. 
Ndu ọhogu ngu byawaru bya anọdu l'ụlo-ndzuko ngu l'atụ ụzu; sụ l'ẹphe mekputawaru. Ẹphe achịko iphe-ọhubama doo ya. 
Ẹphe eme l'ọ bụ onye pa ogbu-nkụ tsoru ẹke ọswa nọ tụgburu; l'egbutsushi iphe bụ oshi, ọ phụru. 
Iphe bụ iphe a pyịru apyịpyi; bẹ ẹphe gude ogbu-nkụ; gude ọngu mebyishikota l'ọ ha. 
Ụlo ngu, dụ nsọ bẹ ẹphe mụru ọku ye; yo tsua ya; yọ bụru ntụ. Ẹke ono, ị fọtaru t'ọ bụru ẹke ii-buru eburu ono; bẹ ẹphe farụshiru afarụshi. 
Ẹphe ekfu l'ime obu ẹphe; sụ: “L'ẹphe e-mebyishikota iya l'ọ ha kpamukpamu!” Ẹphe etsukota ọku l'iphe bụ ẹke, e shi anọduje abaru Nchileke ẹja. 
Ẹ tọ dụhedu iphe-ọhubama, dụ biribiri, eemejekwaduru ayi; ọphu ọ dụhedu ndu nkfuchiru Nchileke, phọdukwaduru nụ; ọphu ọ dụdu ayi onye, maru teke egbe iphe ọwaa emebebe. 
?Bụ teke ole; bẹ ndu ọhogu ngu e-ngeberu ngu ẹka l'ishi; nggụbe Nchileke? ?Ẹphe e-gudewaru ẹpha ngu l'emebyishi ẹge-a gbururu jeye tọo? 
?Bụ ngụnu kparu iphe ị tịi byadụ bya ebyia ẹphe ẹka? Chịfuta nụ ẹka l'ụtakfu bya emebyishia ẹphe. 
Obenu l'ọ bụ nggụbe Nchileke bụ eze nke mu, shi lẹ ede-nwede. Ọ bụ nggu wobataru ndzọfuta lẹ mgboko-a. 
Ọ bụ nggụbedua gude ike ngu kewaa eze ẹnyimu ẹbo. Ẹjo-anụ, butsua lẹ mini b'i gwepyashiru ishi ẹphe etsupyashi. 
Ọ bụ nggụbedua dzọpyashiru ẹjo agiyi ishi; woru iya nụ ụnwu anụ, bu l'echi-ẹgu t'ọ bụru iya nri. 
Ọ bụ nggu gbafushiru ọgba mẹ nggele; mini eshi iya wata atsọtso. I meru ẹnyimu, atsọtsua atsọtso; yọ tashịhu. 
Ọ bụ nggu nwe eswe; nweru ẹnyashi; bụru nggu doberu ẹnyanwu; mẹ ọnwa; ẹphe ekeru jịmujimu. 
Ọ bụ nggu tubuhawaru ẹke a-bụru oke mgboko; bụru nggu doberu ọkochi; dobe winta. 
Nggụbe Ojejoje; nyatakwa ẹge ndu ọhogu ngu ekfutaberu ngu kulakula; mbụ ẹge ndu eswe gude ẹpha ngu afa kutukutu. 
Be ewokwaru ndu nke ngu, ike ẹ-ta nọdu ye l'ẹka ẹjo anụ-ẹgu-ẹgbudu. Ba azahakwa ndibe ngu, bụ ndu aakpa ẹhu t'ẹphe nọduwaru ẹge ono gbururu jeye. 
Nyatakwa ndzụ, ayi lẹ nggu gbaru; kẹ l'eemekwa madzụ omeliwe l'iphe bụ ẹke, gbaru ọchi l'alị-a. 
Be ekwekwa tẹ ndu ono, aakpa ẹhu ono gude iphere tsuphu azụ. Tẹ ndu ụkpa; mẹ ndu, ẹ ta dụdu ẹge ọ haru ẹphe jaa ẹpha ngu ajaja! 
Gbalihunu nggụbe Nchileke; kfuchiaru onwongu. Nyatakwa ẹge ndu eme eswe eshije l'ụtsu nma ngu kulakula jeye ẹnyashi. 
Ba azahakwa hanyịhanyi, ndu ị dụ ashị aba; mbụ wọwowo, ndu ọhogu ngu anọduje atụ ekpu ngu.