Egvu-Ọma.
61.
Egvu, Dévidi deru nụ onye ishi egvu; t'a kpọru une ye iya Nụnua mkpu, mu echi; nggụbe Nchileke! Ngabẹnu nchị l'ekfukfu, mu ekfu anụ ngu! 
Mu nọ l'ẹke mgboko jeberu; l'echiku ngu; kẹle meji atọfu mu atọfu. Dunuru mu je edobe l'oke mkpuma, ka mu l'eli! 
Kẹle mu gbabawaru l'ime ngu; domia onwomu. Ọ kwaphu nggụbedua bụ ụlo-mgbochi, mu nyihuru; nahụ ndu ọhogu mu. 
Ọogukwa mu ẹgu tẹ mu buru lẹ nke ngu jeye lẹ tutu yoyo; mbụ tẹ mu nọdujewaru lẹ mkpuli ẹ́bà ngu; zeeru ndzụ. 
Kẹle nggụbe Nchileke nụwaru iphe mu riburu; lẹ mu e-meru ngu. I mewaru tẹ mu tsoru ndu akwabẹ ẹpha ngu ugvu; keta iphe-ọma, iimejeru ẹphe. 
Menua t'eze kaa nka; t'ọ kaa nka; shi l'ọgbo sweru ọgbo! 
Tẹ aba-eze iya nọdunu Nchileke l'ifu gbururu jeye! Tẹ iphe ii-gude eche iya nche bụkwaru n-yemobu ngu; mẹ ike ono, iivudoshije l'iphe i kfuru ono. 
Ọo ya bụ ẹge mu agụa egvu; gude jaa ngu ajaja gbururu jeye; mekotaje iphe bụ iphe mu riburu k'ememe mbọku-mbọku.