Egvu-Ọma.
52.
Ẹ́vù, Dévidi raru nụ onye ishi egvu. Teke ọ raru ẹ́vù ono bụ teke Dowẹgu, onye Édọmu byaru bya agbaaru Sọlu ama; lẹ Dévidi nọ lẹ kẹ Ahimẹleku ?Bụ ngụnu meru iphe iigudeje ẹjo iphe, iime l'asa nsasa; nggụbe oke madzụ? ?T'ị madu lẹ n-yemobu Nchileke a-nọ jeye lẹ gbururu? 
Iphe shi ngu l'ọnu bụlephu ọkpu-akpọhu. Ire ngu l'atsụlephu nkọ l'ọ bụ ákwọ̀, a baru ababa. Iphe iime ememe l'ọ ha abụkotaru ụgho. 
Ị ka oyeru ẹjo iphe obu; malẹ iphe dụ mma; Ẹjire aka ngu mma; mẹ l'ire-lanụ. 
Iphe i yeru obu bụ okfubyishi madzụ; nggụbe onye ono, adzụ-gbu onwongu l'ẹjo-ire ono! 
Nchileke e-mebyishikwa ngu; mee ngu t'ị bụru kpurupyata gbururu jeyewaru. Oo-wofu ngu; mee ngu t'ẹ b'i buhe l'ufu ngu. Yo fefu ngu l'ọ bụ ẹswa; l'alị ndu nọ ndzụ. 
Ndu doberu ẹka ndoo -phụa ya; ẹphe atsụhu egvu; chịa ya ọchi; sụ: 
“Unu lenu; ọwaa bụ onye jịkaru lẹ ya te emedu Nchileke agbaru-ike iya. Ọ chịru ụkfu kwẹe l'ẹku iya; shi l'omebata ndu ọdo l'eko tsulatsula.” 
Obenu lẹ mbẹdua dụ l'ọ bụ oshi olivu; nọ l'ime eze-ụlo Nchileke; aja rikarika. Mu chịwaru ụkfu kwẹe lẹ n-yemobu Nchileke jeye lẹ tutu yoyo. 
Mu a-nọdu ekele ngu ekele gbururu jeye lẹ gbururu kẹ iphe i meru. Mu a-nọdukpelephu ele ngu ẹnya l'ẹka; kẹ l'ẹpha ngu dụ mma. Mu anọdukwaphu l'ifu ndibe ngu tua ngu ẹpha.