Egvu-Ọma.
51.
Egvu-ọma, Dévidi deru nụ onye ishi egvu Teke o deru iya bụ teke onye nkfuchiru Nchileke, bụ Nétanu byatsụaru nk'iya bya ekfuaru iya l'o meru ẹji lẹ yẹle Betisheba zẹru Nggụbe Ojejoje, ị bụ onye obu-ọma. Ẹ tii gbanwejedu agbanwe. Byiko; phụaru mu imiko. Gude nụ k'eze obu-imiko ngu fuchafu iphe dụ ẹji mu! 
Safụkotanu iphe dụ ẹji mu l'ọ ha; nggu efufukota mu ẹjo iphe, mu meshiru ngu. 
Kẹle mu maru ẹge mu ngetaberu ngu ọkpa l'ishi; ọphu mu azahajẹdu ẹjo iphe mu azaha. 
Ọ bụ nggụbedua gẹdegede; bẹ mu mesweru. Mu mewaru iphe ị sụru l'ọ dụ ẹji. Ọo ya bụ l'iswi dụ ngu mma l'ikpe, i kperu mu; ụta ta dụ ngu l'ikpe, ị nmaru mu. 
Mu shiru teke a mụru mu bụtaru onye eme ẹji. Mbụ lẹ mu shiru teke nne mu tsụtaru ime mu bụtaru ẹjo madzụ. 
Iphe iile ẹnya iya lẹ ndzụ madzụ bụ ire-lanụ. Zinua mu mmamiphe ngu. 
Gudenu isopu saa mu; tẹ mu chahụ dengu! Saa mu tẹ mu ka eberugo ọcha ụcha! 
Menua t'ẹhu tsọo mu ẹna; mu etee ẹswa; k'ọphu mubẹ onye ono, i tsuru pyaapyaa ono e-te ẹswa. 
Lesweta nụ ẹjo iphe, mu meshiru; nggu efufukota iphe dụ ẹji, mu meru l'ọ ha! 
Nggụbe Nchileke; menua tẹ obu gụa mu iphoro; nggu anụ mu ume ọphungu; k'ọphu mu a-nọdu anụru ngu okfu! 
Ba achịfukwa mu l'ifu ngu; ọphu ị nafụkwa mu Ume-dụ-Nsọ ngu! 
Menua tẹ ẹhu-ọtso-ẹna mu laphuta azụ ọdo; mbụ ẹhu-ọtso-ẹna ono, shi l'adzọfuta ono, ị dzọfutaru mu ono. Nggu emee tẹ ome uche-obu ngu heje mu uhere; k'ọphu mu e-shihu ike. 
Teke ono; mu adụje ike l'akpọ-ziru ndu emeswe ngu nụ ụzo nke ngu; ndu eme ẹjo iphe aghakọbe lakfuta ngu. 
Dzọfutanu mu l'ikpe ọchi, mu gburu; nggụbe Nchileke; kẹ l'ọ bụ nggu bụ Nchileke, adzọfutaje mu nụ. Teke ono; mu araa ya arara l'ị bụ onye doberu ẹka ndoo. 
Nggụbe Nnajiufu; kpuhaa mu ọnu; k'ọphu mu a-jaa ngu ajaja. 
Ndẹge ọ bụ l'ọo ngwẹja; bẹ iile ẹnya iya; mẹ mu egwokwaaru ngu iya. Obenu lẹ ngwẹja te emejekwa t'ẹhu tsọ ngu ẹna; m'o -ruhuru; ọ bụru ngwẹja-ukfuru. 
Ngwẹja ọphu Nchileke anatajẹ bụ aphụ oji madzụ obu kẹ iphe o meru. Onye aphụ jiru obu k'iphe dụ ẹji, o meru; bya ataa onwiya ụta; bẹ nggụbe Nchileke ta akpọkwa ẹbo-ẹbo l'afụ. 
Phụnuaru Záyọnu imiko; mee ya t'ọ jaa ajaja. Kpụnua ụpho-mkpuma Jerúsalemu. 
Teke ono; eegwolaaharu ngu ngwẹja, gbaru nụ; ngwẹja-ukfuru atsọlahaa ngu ẹna; a wataru ngu ogbushiru oke-eswi l'ẹnya-ngwẹja ngu.