Egvu-Ọma.
32.
Ẹ́vù, Dévidi raru Ọnu-ọma bụ k'onye Nchileke gụru nvụ l'emeswe, o mesweru iya; mbụ onye Ojejoje safụru iphe dụ ẹji, o meru. 
Ọnu-ọma bụ kẹ onye Ojejoje ta agụkoduru iphe dụ ẹji, o meru; mbụ onye ẹ-te nwedu ẹregede, nọ iya l'ẹhu. 
Teke mu te kfudu iphe mu meru; bẹ ọkpu, nọ mu l'ẹhu tsụ-gwoshihukotaru mu atsụ-gwoshihu. Ishi iya abụru kẹ ude, mu anọduje atsụ mbọku-mbọku. 
Eswe l'ẹnyashi mbọku-mbọku; bẹ ịinoduje ebyi mu ẹka l'ẹhu. Nggu eshi ẹge ono mịchata nwike, nọ mu l'ẹhu l'ọ bụ onye ụguru guderu. 
Tọ dụ iya bụ; mu abya emee t'ị maru iphe dụ ẹji, mu meshiru. Ẹ to nwedu iphe dụ ẹji, mu meru ọphu mu domiru ngu edomi. Mu asụ lẹ mu a-kọshikotaru Nchileke ejeswe, mu jesweru. Nggu abya agụaru mu nvụ l'iphe dụ ẹji, mu meshiru. 
Ọo ya bụ; tẹ iphe bụ ndu eme iphe dụ nggụbe Nchileke mma kfuje nụ ngu teke ẹphe nọ lẹ mkpa; k'ọphu bụ teke iphe-ẹhuka ono a-bya l'ọ bụ utso; too rudu ẹphe l'ẹhu. 
Ọ bụ nggu bụ ẹke mu edomije onwomu. Yọ bụru nggu anọduje eleta mu t'iphe-ẹhuka ba dakfuta mu; nggu egude egvu, e gude atụ okokooko gude gbaa mu mgburumgburu. 
Ị sụru l'ịi-nọdu atụ-ziru mu ẹka; l'ezikwa mu phụ ụzo, mu a-nọdu eshi. Ịi-nọdu akpọ-ziru mu ụzo; l'eletakwa mu phụ ẹnya. 
Wo mu tẹ mu ba adụkwa l'ọ bụ ịnya; m'ọ bụ ịnya-mulu; kẹ l'ẹphe te nwedu egomunggo. Iphe eegudeje agọ ẹphe bụ ajaba; mẹ odogoro. Teke ẹ tii medu iya ẹge ono; tịi gọkotadu iya. 
Ndu akirishi; bẹ anọduje eje iphe-ẹhuka, dụ l'igwe! Obenu l'onye dakoberu Ojejoje bẹ n-yemobu iya anọ-pheje mgburumgburu. 
T'ẹhu tsọo unu ẹna k'iphe Ojejoje anọduje emeshi; unu etekwaaphụ ẹswa; unubẹ ndu doberu ẹka ndoo! Unu agụa egvu ẹhu-ẹna; unubẹ ndu obu gụru iphoro!