Egvu-Ọma.
8.
Egvu-ọma, Dévidi deru nụ onye ishi egvu; t'e gudeje ngwa-egvu gítitu gụa ya Nggụbe Ojejoje, bụ Nnajiufu ayi; ẹge ẹpha ngu dụ-bekwanu ugvu lẹ mgboko gbaa mgburumgburu; meru ọdu-biribiri ngu; yọ ghaa imigwe. 
I mewaru ụnwegirima nshịi; mẹ ndu angụ ẹra; ẹphe awata ngu ọja ajaja; l'ọgvu ndu ọhogu ngu; shi ẹge ono mee tẹ ndu ọhogu ngu; mẹ ndu eme t'ẹphe gwata ngu ụgwo daa shịkongu. 
Teke mu leru ẹnya l'igwe; phụ iphe i gude mkpụshi-ẹka ngu meshia; mbụ ọnwa; mẹ mkpọ-kpodo, bụkota iphe i meshiru dobe; 
mu ajịlahaa; sụ: “?Bụ ngụnu bẹ madzụ bụ; kẹ t'ị rivu iya l'ọriri? ?Bu ngụnu bẹ madzụ mmanu bụ; kẹ t'ii iya ẹnya?” 
I meru iya; iphe ụnwu imigwe gude ka iya ta aha l'ọ bụ ịnyi-nvọ. I kpuberu iya ọdu-biribiri l'ọ bụ okpu; bya akwabẹ iya ugvu, ha nshinu. 
I nụru iya ike t'o letaje iphemiphe ọbule i keru ekeke ẹnya; bya emekwaaphu tẹ iphemiphe ọbule nọdukota iya l'ẹka; 
mbụ l'i meru tẹ atụru; mẹ eghu; mẹ eswi; mẹ iphemiphe ọbule, bụ anụ-ẹgu-ẹgbudu l'ẹphe ha; 
mẹ ụnwu ẹnu, ephe l'eli; mẹ ẹma, bu lẹ mini; mẹkpo iphemiphe ọbule, bu lẹ mini l'ẹphe ha nọdukota iya l'ẹka. 
Nggụbe Ojejoje, bụ Nnajiufu ayi; ẹge ẹpha ngu dụ-bekwanu ugvu lẹ mgboko-a l'ọ ha.