Jobu.
17.
“Ume ta nọhekwa mu. Nke mu gụakwaru. Mu nọokwa l'eche mbọku, ee-ye mu l'ili. 
Ọ bụlephu ndu azụru mu ukwe bụ ndu nọ-pheru mu mgburumgburu. Ẹke ẹnya mu anọje bụlephu l'ẹjo oshi ono, ẹphe nọru mu ono. 
Nchileke; byiko; yenu onwongu l'itumo l'okfu ẹka mu ẹge ono, ịicho ono; kẹ l'ẹ tọ dụdu onye ọdo, a-naghe mu mkpalẹka ọdo; gbahaa nggụbedua. 
I mechishiwaru ẹphe ẹkpa egomunggo; tọ dụhe iphe, edojekwadu ẹphe ẹnya. Be ekwekwa t'ẹphe mekputa mu. 
Onye jịkaru ndu ọ̀nyà iya l'okfu iphe oo-rita iya; bẹ ụnwu iya e-mekochaa tsụa ìshì. 
Nchileke mewaru mu; mu abụru iphe, ndiphe gude aghọ ụgho okfu; iphe bụ onye phụru mu nụ; yọ gbụa mu ọnu-mini l'ifu. 
Mu gụwaru aphụ l'elewa-a gẹgege; mbụ l'ọ bụwa-a nwonyonyo mu; bụ iphe phọduru nụ. 
Ndu, obu gụru iphoro b'o teru ụkfu. Ndu iswi dụ mma aswọlihu; tso ndu ẹ-te emedu ele Nchileke. 
Ọle ẹge ọ dụ ẹge ọ dụ; bẹ ndu doberu ẹka ndoo a-bụkpelekwaphu ndu ẹphe bụ. Ndu doberu ẹka ndoo a-nọdu aka ike akaka eje. 
Obenu; unu l'unu ha; u nu byanụ ọdo. Ẹ to nwekwa l'unu ha m'ọ bụ onye lanụ, nweru egomunggo. 
Nke mu gvụakwaru. Iphemiphe ọbule, mu shi rịa k'ememe te nwehekwa. Ẹge ono kwaphu; bẹ iphe, bụ iphe shi gụa mu k'ememe bụwa kẹ mmanu. 
Ndu-a wowaru ẹnyashi kua eswe; woru ‘ọchi’ kua ‘iphoro.’ 
Ọ -bụru lẹ mkpakọ ufu mu bụ alị-maa; ọ -bụru l'ẹke mu a-tọgbo iphe-azẹe mu bụ l'ẹke gbaru tsụbalangu; 
ọ -bụru lẹ mu sụru ili l'ọo ya bụ nna mu; bya ekua ẹhonwu nne mu; ọ dụdu bụru nwunne mu nwanyi: 
?bụhunu awe ọdo; bẹ mu elekwadu ẹnya iya. ?Bụ onye a-sụbaa mu l'ọo iphe, mu a-nọdu ele ẹnya iya ndọ-ọ. 
?Oo-tsoru mu nwuda l'alị-maa tọo. Mu l'iya; ?ayi a-chịko bụru ẹja tọo.”