Jobu.
8.
Tọ dụ iya bụ; Bilidadu kẹ Shuha abya eyeeru Jobu ọnu; sụ iya: 
“?Bụ teke ole b'ii-kfu ẹge-a kfubebe? 
Ikpe Nchileke; ?oogbeje nggọ tọo? Mbụ; Ọkaribe-Kakọta-Ike; ?oomeje t'iphe vudo nhamụnha gbe nggọ tọo? 
Ọo-bụkwa-a iphe, dụ ẹji, ụnwu ngu meru iya b'ọ gwataru ẹphe ụgwo iya. 
Obenu l'i -gbakfuta Nchileke; bya arọo Ọkaribe-Kakọta-Ike; 
ọ -bụru-a l'ị dụebe mma; bụru onye ire-lanụ bẹ oo-gbeshia nta-a; gbaaru ngu mkpu; mee t'i laphu azụ l'ọkwa, i shi nọdu. 
L'ọdungu; bẹ ọo-dụ l'ị ha nwanshị; obenu l'o -rua l'ikperazụ; bẹ ịi-bụ oke amadụ. 
Jịnua ndu bụ ọgurenya t'ẹphe kọoru ngu iphe, shi amụjeru ndiche ẹphe. 
Ayịbedua kẹ ụnyaphua; ?bụ ngụnu bẹ ayi maru. Ọ kwaphụ ẹge ono bẹ ndzụ ayi dụ kẹ nwa tsokengu lẹ mgboko-a. 
Ndu ono e-zi ngu-a iphe; kfuru okfu ye ngu lẹ nchị. Gekwaaru ẹphe nchị. 
Èjì; ?oovuje ogologo l'ẹke ẹ-ta bụdu ụda. Ẹkwo okpuru; ?ọonoje l'ẹke mini ta nọdu. 
Ọobuje; mini -gvụlephu; yo vuru iphe bụ ẹgbudu, nọ l'ẹke ono ụzo nwụshihu. 
Ọ bụ ẹge ono bẹ ọotsa-kfuje ndu zaharu Nchileke. Ọ bụ ẹge ono bẹ iphe, ndu ẹ-ta madu Nchileke ele ẹnya iya abụjeru ẹphe kẹ mmanu. 
Iphe, ọ dakoberu adụje l'ọ bụ eri. Iphe, ọ kpọru obu yeru adụ gẹphere-gẹphere l'ọ bụ ụgbu mkpakiri. 
Teke ọ dakoberu ụgbu mkpakiri ono; yọ daa. Ọ-gbakụa ya ẹka; to nwedu ọphu eme nụ. 
Ọ dụ l'ọ bụ iphe, a kụru l'anwụ; l'agba iya mini. Yo rushia iru ọphungu ji mgbabu ono; 
gbakụshia akwara l'ikpo mkpuma; l'ẹke ọocho ẹke, dụ ekfu-ekfu. 
E -fefu iya l'ẹke ono, o futaru ono; ẹke ono ajịka iya; sụ lẹ ya ta aphụbukwa ya. 
Yọ bụwaru iya phụ; ẹwu ọdo abya efuchia l'eke ono. 
Nchileke ta ajịkajekwa onye ẹ-ta dụdu iphe, o meru; ọphu ọ bụjekwanu agbarike ndu eme iphe, dụ ẹji. 
Oo-mekocha mee; ọnu abụru ngu ọnu-ọchi. Yọ bụru okoo bụ ịi-nọdu atụ. 
Iphere e-mekochaa bụru kẹ ndu ọhogu ngu; ufu ndu eme akirishi achịhu.”