Jobu.
7.
“?Tọ bụdu ọru-ike; bẹ madzụ byaru lẹ mgboko-a. Ndzụ iya; ?tọ dụdu l'ọ bụ ndzụ onye e buru ozi. 
Ọ dụ l'ọ bụ ohu, bụ iphe ọonoduje ele ẹnya iya bụ nwagu urẹnyashi; mbụ l'ọ bụ onye e buru ozi, bụ iphe, ọonoduje eche bụ ụgwo-ọru iya. 
Ọ bụ ẹge ono b'ọ dụ mu. Iphe, bụ ọnwa, sweru esweswe abụkotajeru mu 'ọ-ga-lẹ-mkpa. Ẹnyashi, mụtaru amụta; mu aghakọta gbụrugburu. 
Mu -laa l'ụlo; mu anọdu lẹ mgbamuche kẹ wo: ?Bụ teke ole bẹ nchi a-bọhu. Ẹnyashi -nọdu; yọ kpụ onwiya gọlogolo. Mbẹdua l'agha gbụrugburu jeye teke nchi a-bọhu. 
Ẹhu mu l'ọ ha bụkota ẹhonwu mẹ inyi bẹ jiru iya nụ. Akpọ-ẹhu mu l'ọ ha kejashihukotaru mu ekejashihu; bụru ọnya. 
Ndzụ mu gbe kakwa ngga, e gude ekwe ẹkwa ọso; ndzụ mu ekwo swaraswara l'ẹ b'ọ dụ iphe, mu levuru ẹnya iya. 
Byiko Nchileke; nyatakwa lẹ ndzụ mu ta dụdu iphe ọdo, ọ bụ; gbaha udzu-ọnu. Ẹ to gbe bụdu l'ẹhu a-tsọkwadu mu ẹna ọdo lẹ ndzụ mu ọwaa. 
Onye phụru mu nta-a ta aphụkwa mu ọdo; ii-chọ mu; ọbule ẹ tịi phụhedu mu. 
Ọ bụ ẹge ono, urukpu asakahuje ono; bụ ẹge onye, e kpochiru l'ili ta alatahẹdu azụ ọdo. 
Ẹ tọ latahẹdu azụ l'ụlo iya; ọphu ufu iya 'amahẹdu iya ọdo. 
Ọ bụ iya kparu iphe mu te edobedu ọnu ndoo. Mu a-nọdu ata kpụkpurukpu l'ekfushi ẹge ẹhu dụ mu; chịko ẹge meji aphụ-tabe mu ụphu kfushia. 
Unu eche mu nche; ?mu bụ eze ẹnyimu; ?tẹ mu bụ ẹjo anụ, bu l'eze ẹnyimu? 
Mu shi arị l'oshi-azẹe mu e-me t'ẹhu dụ mu agu; mbụ l'aba-anụma mu e-me tẹ nggụmaphu mu ka nwanshị;. 
Obenu l'i gudele-e ẹjo nrọ; gude àphụ̀; gude nkopyabe l'eye mu egvu; 
k'ọphu bụ lẹ mu gbe hata l'e yeru mu eri l'ẹkpiri; hata anwụhu; malẹ egbe ndzụ ọwaa, mu nọ nta-a. 
Ndzụ ta gụhekwa mu agụgu; ike k'ọnodu ndzụ agvụwa mu. Hakpẹle mu phụ ahaha; lẹ ndzụ, mu nọ ta dụhedu iphe, ọ garu mu! 
?Bụ ngụnu bẹ madzụ bụ kẹ t'i gbe mee ya t'ọ ha nshinu? ?Bụ ngụnu bẹ madzụ bụ; kẹ t'i rivuje iya l'ọriri; 
mbụ kẹ t'i nyochaje iya l'ụtsu mbọku-mbọku; l'àhụ̀ iya ama tekenteke? 
?Tịi kabekpodua wofu mu ẹnya; m'ọ bụ t'ị haẹdu mu tẹ mu kebe lee ọphu bụ ọnu-mini? 
Ọ -bụru lẹ mu meru iphe dụ ẹji; ?bụ ngụnu bẹ mu meru nggụbedua; bụ onye eche madzụ nche? ?Nanu ẹge ọ du b'ọ bụ mu b'ị bya aphụbe ẹnya? ?Mu bụwa iphe-ẹhuka nọduru ngu tọo? 
?Nanụ ẹge ọ dụ b'ẹ tịi gụkpoduaru mu nvụ l'ẹke mu mesweru ngu; mbụ paru haa l'iphe, dụ ẹji ọbu, mu eme ọbu; kẹ l'ẹ ta anọhekwa ọphu, baru ishi; e kpochia mu. Ịi-chọ mu nta chọo mu imo; tịi phụhe mu.”