Psalms.
150.
Madayaw hi APU DIOS! Dayawon yuh Apu Dios nah Templona! Ya dakayun wadah langit, dayawon yu hiya an Dios an nakattag-e. 
Dayawon yuh Apu Dios gapu nadah inat nah nangipatib-anah ongal kabaelana! Dayawon taku te maid di niingngohan di kinatag-ena. 
Ipagango yuy tangguyub yu, takon di ayyuding ya gitala hi pundayaw yun Apu Dios. 
Ya tobabon yuy tamburin, gitala, ingiing ya gangha ta manayo takuh pundayaw takun Apu Dios. 
Am-in takun matagu, dayawon takuh APU DIOS. Madayaw hi APU DIOS!