Psalms.
129.
Ditakun holag Israel, kalyon takuy numpaligligat di buhul taku ke ditaku nipalpuh kaunga taku. 
Om, kanan takuy “Nipalpu handih kaungak ya namahig di numpalpaligat di buhul kun ha-on. Mu uggeyak kinabaelan an inapput. 
Himmalom di nunliput dah odog kun umat nah naaladun payo, 
mu hi APU DIOS ya makaphod ot poppogonay nihbutak nadah gaga-ihon tatagu.” 
Hana ot ta am-in nadan humihhingit hi iZion ya maapput dat bumtik da. 
Ya hana ot ta am-in da ya umat da nadah holok an tinummol hi atop an gagala ya nakleng. 
Yaden maid pay ni-moy manangud an e mangamung ta uyunona. 
Hana ot ta maid nadah luma-u kediyen boblen di buhul kuy mangali ke dida hi “Bendisyonan dakayun APU DIOS.” weno “Bendisyonan dakayu hi ngadan APU DIOS.”