Psalms.
121.
In-ang-ang ku nadah bilid ya kanak hi nomnom kuy “An waday bumaddang ke ha-on?” 
Om, baddanganak ke APU DIOS an nunlutuh kabunyan ya luta. 
Takon di dakayu ya baddangan dakayu ke hiyat maka-ippaptok kayu. Hiya ya ad-addi mahuyop, ad-addi mable ya nidadaan an mangipaphod ke ditakun holag Israel. 
Hi APU DIOS mismuy mangipaptok ya mihahag-on an mun-adug ke ditaku 
ta maid di maat ke ditaku nah mapat-al ya nah hilong. 
Hi APU DIOS di mangihwang ke ditakun am-in hanadah katatakut an maat ta maka-ippaptok takut nangamung. 
Om, takon di daanay kawad-an taku ya ipaptok ditakun hiyat nangamung.