Psalms.
110.
Kanan APU DIOS nah Apuk di “Umbun kah winawwan ku inggana paka-apputok am-in di buhul mu.” 
Idoldol APU DIOS di pun-ap-apuwam mipalpud Zion ta sakupom takon di boblen di buhul mu. 
Hantuh algon pakihanggaam hi buhul mu ya gagaid nadan tatagum an munhilbin he-a. Ya kediye ya ibulwatim di bulwatin di ap-apu ya mawaday ongal an kabaelam umat hi timilan di algo nah biggatna. 
Adi ibahhon APU DIOS hi tuwen insapatanan kananay “He-a Melkisidek, tinuddu dakan mumpadit nangamung.” 
APU DIOS, wada nan Ap-apuh winawwan mu. Ahina paka-apputon di papatul hantuh algon pangipatib-anah boh-ol na. 
Ya ahina humalyaon am-in di tagut mungkakate dat mipu-ul di aadol da. Ya apputona nimpen am-in di papatul hi kabobboble tuh luta. 
Hiyay mangapput am-in hi gubat. Ta takon di daanan bobley pangayana ya uminum hi danum hanadah oob-ob hidi.