Psalms.
93.
Hi APU DIOS di patul. Hiya ya madayaw tuwali ya Kabaelanan am-in. Inhamad nan inha-ad tun luta nah niha-adana. 
Hay pumpatulam, APU DIOS ya wada tuwali. Ya he-a ke damdama ya wada ka tuwalit nangamung. 
Nakal-ot nan dalluyun hi baybay an kay kidul di bungug na. 
Mu nalnal-ot ka an Ap-apuh langit mu nadan makabbungug an dalluyun hi baybay. 
APU DIOS, munnanong an adi malumman nadan tugun mu. Takon nan makaphod an Templom ya munnananong ta nangamung.