Psalms.
76.
Dayawon nadan tatagud Judah ya Israel hi Apu Dios te nundingngol di ngadanah di. 
Hay nunhituwana ya nah bilid an Zion ad Jerusalem. 
Hidiy nunggi-uwana nadah panan nadan buhul na, hay happiyo da ya ispada da ya am-in di almas da. 
Apu Dios, makakkaphod ka ya madayaw kan abu mu nadan makaphod an bibilid. 
Inapput mu bo kaya nadan kalkal-otan an buhul mi ot pun-ala miy limmu da. Ya ad uwani ya mungkakate da. Daan boy inlot da ya laing da. 
Apu Dios an Dios di holag Jacob, impatibom di boh-ol mu ya nungkakate nadan kakabayu ya nadan titindalun nuntakke. 
Matakutan kan abu Apu Dios. Dahdiy kabaelanan makihangga hin bimmoh-ol ka? 
Wada kah langit ya impainilam an makastiguy tatagu tuh luta gapuh liwat da. Ya timmakut da ot umop-opya da 
te humalyaom nadan gaga-ihot ihwang mun am-in di mipaligligat an tatagu tuh luta. 
Hay boh-ol muh tatagu ya kidayawam moh udot. Ya nadan munhiktam hi takon di ittay an boh-ol mu ya magilat da bo kaya. 
Dakayun tatagu, aton yuy insapata yu nah AP-APU an Dios yu. Umiali kayun am-in an tataguh kabobbobleh regalo yun idat yu ke hiya an DIOS an madayaw ya matakutan. 
Patakutonay papatul ya ma-idonay tulid di aap-apu.