Psalms.
16.
Apu Dios, tibom anhan ta maid di maat ke ha-on hi ad-adi te he-ay pundinolak an kihikugak. 
Kanak ke APU DIOS di “He-ay Apuk, am-in di wadan ha-on ya nalpun he-a.” 
Pakatoballok nadan makangngun-unud ke APU DIOS ya umamlongak an maki-kien dida. 
Mu nadan tatagun hay udum an dios di dayawon da ya mad-uman di ligat da. Adiyak pe makid-um ke didan mun-appit ya adik dayawon di dios da. 
APU DIOS, he-a ya abuy mialig an tawid ku ya idat mun am-in di mahapul ku. Ya he-ay mangipaduttuk hi nitaguwak. 
Paddungnay impatawidanak hi makaphod an luta te makakkaphod di nitaguwak an indat mun ha-on. 
Dayawok hi APU DIOS an mangituttuduh maphod an atok, takon nah hilong ya ipanomnom nan ha-on nadan tuguna. 
Ya inilak an hiya ya wadat nangamung ke ha-on, kinali madinolak. 
Ta hidiye nan maan-anlaak an mangalkalih kaphod mu, APU DIOS. Takon di mateyak ya inilak an mahuwanak ke he-at 
adiyak punnanongon hi lubuk ta adiyak mabuluk hidi te ha-oy di pinilim an muttatyum. 
Impainilam ke ha-on an mahuwanak hi katayak ya mun-am-amlongak te wada kat nangamung an pundinolak.