Genesis.
40.
Indanit nabaybayag ya bimmungot nan patul te waday numbahulan nan mangapyah tinapay na ya nan mumpaptok hi bayan inumona. 
Ot ipakalabut na dida nah nikalabutan Joseph hi balen nan ap-apun di guwalya. 
Nabaybayag dah di nah kalabut ta loktat ya impumbalin nan ap-apun di guwalyah Joseph an mangipaptok ke dida. 
Ohan hilong ya waday inin-inop dadiyen duwan balud an nunhinnatkon di kibalinana. 
Ta kediyen nabigatana an e tibon Joseph dida ya matibon mabulubulun da. 
Hinanhanana an kananay “Tipet mabulubulun kayu?” 
Ya kanan day “Man-uke ya waday inin-inop mi, mu maid di mangipainilah kibalinana.” Kanan Joseph di “Hi Apu Dios di kalpuwan di kabaelan an mangipainilah kibalinan di in-inop. Kalyon yun ha-on di inin-inop yu.” 
Ot kanan nan mumpaptok hi bayay “Athituy in-inop ku. Wada nan nitanom an grapes an 
tuluy hapang na. Indani ya himmabung ot mumbalin hi bunga ya gagalan nal-um. 
Inodnak nan basun nan patul ot umalaak nah grapes ot pohpohok nah basu ot idat ku nah patul.” 
Ya kanan Joseph di “Hay kibalinan nae ya athitu: Nan tulun hapang ya tulun algo. 
Mala-uy tulun algo ya mipae kat pumbangngadon dakan nah patul nah ngunum tuwali. 
Ya deket anhan ta mibangngad ka nah ngunum ya adiyak kal-iwan ta ahiyak pakikalkali nah patul ta kal-ina ot ya mipaeyak damdama. 
Te ha-oy ya inibtikak an inilpuwak hi boble min Hebrew ot deyan dehtuwak hi kalabutan mu maid di bahul ku.” 
Dingngol nan pangapyaon nan patul hi tinapay an maphod di kibalinan nan inin-inop nan ibbana ya kinali na damdaman Joseph di in-inop na. Kananay “Hay inin-inop ku ya waday in-agtuk hi tulun basket. 
Ya nah nuntap-on basket ya waday niha-ad hi mungkaphod an tinapay an kanon nan patul, mu nungkan di hamuti.” 
Kanan Joseph ke hiyay “Hay kibalinan naen tulun basket ya tulun algo. 
Mala-uy tulun algo ya ipaputul nan patul di ulum ya itattayu nay adol mut pungkan di hamuti.” 
Handih nala-uy tulun algo ya nadatngan di algon nitungawan nan patul ot ayaganan am-in nadan aap-apun pungngunuwona ot munhahamul da. Impalah-una nadan duwan nikalabut an dadiye nan mangapyah tinapay ya nan mumpaptok hi mainum ot paaliyona didah kad-ana. 
Hanan mumpaptok hi bayan inumona ya nipae ot mibangngad nah ngununa tuwali. 
Mu nan mangapyah tinapay ya impipatena. Dadiyen naat ya dadiyey inabig Joseph an kibalinan di in-inop da. 
Mu hanaken mumpaptok hi bayan inumon nan patul ya nakakkal-iwanay mipanggep ke Joseph.